काठमाडौं । आम आदमी पार्टीकी नेत्री आतिशी भारतको दिल्लीको नयाँ मुख्यमन्त्री बन्दै छिन् । आम आदमी पार्टीका नेता गोपाल राईले मंगलबार सञ्चारमाध्यमलाई यस्तो जानकारी गराएका हुन् । राईले आतिशी अप्ठ्यारो परिस्थितिमा दिल्लीको मुख्यमन्त्री बन्न लागेको बताए ।

अरविन्द केजरीवालले पदबाट राजीनामा दिएपछि पार्टीको विधायक दलको बैठकमा अतिशीलाई मुख्यमन्त्री बनाउने सहमति गरिएको हो । विधायक दलको बैठकमा केजरीवाल आफैँले मुख्यमन्त्रीमा आतिशीको नाम प्रस्ताव गरेका थिए ।

हालका मुख्यमन्त्री केजरीवालले गएको आइतबार आम आदमी पार्टीका कार्यकर्तालाई सम्बोधन गर्दै दुई दिनपछि राजीनामा दिने घोषणा गरेका थिए । त्यसपछि आतिशीको नाम पनि यो पदको दौडमा समावेश थियो ।

उनीबाहेक राई र कैलाश गहलोतका साथै अरविन्दकी श्रीमती सुनीता केजरीवालको नाम पनि चर्चामा थियो ।

तर, ४३ वर्षीया आतिशीको नाम टुंगो लगाइएको छ । आतिशी आउँदो विधानसभा निर्वाचनसम्म दिल्लीको मुख्यमन्त्री रहनेछिन् ।

सोमबार बसेको बैठकपछि आतिशीलाई यो दौडमा अग्रस्थानमा मानिएको थियो । केजरीवाल जेलमा रहँदा उनले सबैभन्दा धेरै मन्त्रालय र विभाग सम्हालेकी थिइन् ।

उनले मनीष सिसोदिया शिक्षामन्त्री हुँदा शिक्षा क्षेत्रमा धेरै महत्त्वपूर्ण काम गरेकी थिइन् । सिसोदियाको अनुपस्थितिमा उनले शिक्षा विभाग पनि सम्हालेकी थिइन् । आतिशी केजरीवालको विश्वासपात्र मानिन्छिन् ।

जब आतिशीले मन्त्री पद पाइनन्...
सन् २०२० को विधानसभा निर्वाचनपछि केजरीवालको मन्त्रिपरिषद्‌मा आतिशीसहित कोही पनि महिलालाई स्थान दिइएन । त्यति बेला पार्टीका केही नेताले आतिशीलाई मन्त्री नबनाइएको भन्दै आलोचना गरेका थिए ।

विधानसभाका ७० मध्ये त्यति बेला आम आदमी पार्टीले ६२ सिट जितेको थियो । तीमध्ये आठ महिला विधायक थिए । तर, केजरीवालले मन्त्रिपरिषद्‌मा महिलालाई स्थान दिएनन् ।

समयसँगै दिल्लीको राजनीतिक अवस्था फेरियो । मनीष सिसोदिया, सञ्जय सिंह र त्यसपछि केजरीवाल आफैँ जेल गएपछि आतिशीले सरकारदेखि पार्टीसम्मका मुद्दा सम्हालिन् ।

उनी सन् २०२३ मा पहिलोपटक केजरीवाल सरकारमा शिक्षामन्त्री बनेकी थिइन् ।

आतिशी कसरी ‘आप’को सम्पर्कमा आइन् ?
इन्डियन एक्सप्रेसको रिपोर्टअनुसार, आतिशी दिल्ली विश्वविद्यालयका प्रोफेसर विजयकुमार सिंह र तृप्ता वाहीकी छोरी हुन् ।

उनले दिल्लीको स्प्रिङडेल्स स्कुलमा अध्ययन गरेकी थिइन् । स्टीफन्स कलेजबाट इतिहास पढेकी छन् । उनले अक्सफोर्ड विश्वविद्यालयबाट स्नातकोत्तर गरेकी छन् ।

पछि आतिशीले आन्ध्र प्रदेशको ऋषि भ्याली स्कुलमा पढाइन् । उनी अर्ग्यानिक खेती र शिक्षा प्रणालीसँग सम्बन्धित काममा सक्रिय भइन् ।

पछि उनी भोपाल आइन् । त्यहाँ उनले धेरै एनजीओमा काम गरिन् । यसैक्रममा उनी आम आदमी पार्टी र प्रशान्त भूषणको सम्पर्कमा आएकी थिइन् ।

उनी अन्ना आन्दोलनको समयदेखि संगठनमा सक्रिय छिन् । हाल आम आदमी पार्टीको प्रमुख अनुहारमध्ये एक हुन् ।

आतिशी २०१३ मा आम आदमी पार्टीमा प्रवेश गरेकी थिइन् ।

उनले सन् २०१५ देखि २०१८ सम्म दिल्लीका तत्कालीन शिक्षामन्त्री मनीष सिसोदियाको सल्लाहकारका रूपमा काम गरेकी थिइन् ।

आम आदमी पार्टीको वेबसाइटमा दिइएको जानकारी अनुसार, सिसोदियाको सल्लाहकार रहँदा उनले दिल्लीका सरकारी विद्यालयको अवस्था सुधार, विद्यालय व्यवस्थापन समिति गठन र निजी विद्यालयलाई अनावश्यक रूपमा शुल्क बढाउनबाट रोक्न कडा नियम बनाउनेलगायत काममा महत्त्वपूर्ण भूमिका निर्वाह गरिन् ।

दिल्ली सरकारमा हाल आतिशीले राखेका विभागहरूमा शिक्षा, उच्च शिक्षा, प्राविधिक प्रशिक्षण र शिक्षा, सार्वजनिक निर्माण विभाग, ऊर्जा, राजस्व, योजना, वित्त, सतर्कता, पानी, जनसम्पर्क र कानुन–न्याय समावेश छन् ।

उनी दिल्लीको कालकाजी क्षेत्रकी विधायक हुन् ।

जब आतिशीले आफ्नो थर हटाइन्...
आतिशीलाई ‘आप’ले पहिलोपटक सन् २०१९ को लोकसभा निर्वाचनमा पूर्वी दिल्ली सिटबाट उमेदवार बनाएको थियो । त्यति बेला उनलाई आतिशी मार्लेनाको नामले चिनिन्थ्यो । उनलाई त्यसअघि पर्दा पछाडि सक्रिय नेताहरूमा गनिन्थ्यो ।

२०१९ को आमनिर्वाचनको समयमा मानिसको भीडअगाडि आतिशीको हातमा माइक देखेपछि अनुमान गरिएको थियो कि उनी चुनावी राजनीतिमा ‘आप’को एक महत्त्वपूर्ण महिला अनुहार बन्न सक्छिन् ।

सोही निर्वाचनको प्रचारप्रसारका क्रममा आतिशीले पार्टीका सबै अभिलेख र चुनावी अभियानसँग सम्बन्धित कागजातबाट आफ्नो थर अर्थात् ‘मार्लेना’ हटाएकी थिइन् ।

त्यति बेला भारतीय जनता पार्टीले आतिशीलाई उनको थरका कारण विदेशी र क्रिस्चियन भन्दै निसाना बनाउन थालेको थियो । तर, उनले आफ्नो परिचय प्रमाणित गर्न समय खेर फाल्न नचाहेको भन्दै थर हटाएको बताएकी थिइन् ।

आतिशीका आमाबुवालाई वामपन्थी झुकाव भएको मानिन्छ । र, उनलाई कार्ल मार्क्स र भ्लादिमिर लेनिनको नामका अक्षरहरू मिलाएर ‘मार्लेना’ उपनाम दिइएको थियो ।

आतिशीको उपनामको विवादबीच सिसोदिया उनको बचाउमा उत्रिएका थिए ।

२०१९ को निर्वाचनमा आतिशी तेस्रो स्थानमा रहेकी थिइन् । र, गौतम गम्भीरले भाजपाको टिकटमा चुनाव जितेका थिए । त्यसपछि आतिशीले आफ्नो एक्स ह्यान्डलबाट थर पनि हटाइन् । बीबीसी हिन्दीबाट ।