काठमाडौं । सहकारी संस्था बचत रकम दुरुपयोग सम्बन्धमा संसदीय छानबिन विशेष समितिले सोमबार आफ्नो प्रतिवेदन बुझाएको छ । नेकपा (एमाले)का सांसद सूर्य थापाको नेतृत्वमा बनाइएको सात सदस्यीय छानबिन समितिले सर्वसम्मत रूपमा तयार पारेको प्रतिवेदन संसद्‌मा बुझाएको हो ।

समितिका तर्फबाट सभापति थापाले पेस गरेको प्रतिवेदन कार्यान्वयनका निम्ति सरकारसमक्ष पठाउन सभामुख देवराज घिमिरेले संघीय संसद् सचिवालयलाई निर्देशन दिएका छन् ।

बैठकमा त्यसअघि सभापति थापाले समितिले तथ्यमा टेकेर सत्यको खोजी गरी प्रतिवेदन तयार पारेको बताए । समितिका ५६ बैठक बसेको, ४०० बढी व्यक्तिसँग छलफल र प्राप्त उजुरीको पनि अध्ययन गरेको उनले जानकारी गराए ।

थापाले भने, “समितिमा प्राप्त भएका उजुरीहरू र गुनासोको सकेका छानबिन र अनुसन्धान गर्‍यौँ,” उनले भने ।

उनले समितिले सहकारीको अवधारणा, यसको विकास र समस्याका विषयमा जानकारी हासिल गरेको पनि बताए । “सहकारीको वित्तीय विश्लेषण गरेको छ, जुन साँच्चिकै असहज अवस्थामा गुज्रिएको छ । सहकारीहरू बचत अपचलनबाट समस्यामा गुज्रिएका हुन्,” थापाले भने, “अध्ययनमा बचत तथा ऋणको कारोबार गर्ने सहकारीहरूमा सबैभन्दा धेरै समस्या छ । सहकारीहरूले ऋणको धितो सकार्दा ऋण मूल्यमै लिलाम गर्ने  गरेकाले बचतकर्ताको बचत अपचलन भएको छ ।”

अपचलन गरिएको बचत अरू बैंकमा सार्ने र गैरबैंकिङ क्षेत्रमा पुर्‍याउने गरेको देखिएको उनले उल्लेख गरे । उनले गैरबैंकिङ क्षेत्रमा पुगेको बचत फिर्ता गर्न कठिन अवस्था देखिएको सुनाए ।

गोर्खा मिडियामा लगिएको सहकारीको बचतको मुख्य विषयले समिति गठन गरिएको थियो । त्यसमा तत्कालीन गृहमन्त्री रवि लामिछानेको संलग्नताको आशंका गरिएको थियो । त्यसबारे थापाले एउटा मात्र वाक्य भनेर टुंग्याए ।

“गोर्खा मिडियामा प्रवाह भएको सबै रकम *६५ करोड सहकारीबाटै प्रवाह भएको छ,” थापाले भने, “सहकारी क्षेत्रबाहेकको रकम त्यहाँ प्रवाह भएको छैन ।”

*६५ हुनुपर्नेमा यसअघि ८५ भएकाले सच्याइएको छ ।