काठमाडौं । भेनेजुएलामा राष्ट्रपति निकोलस मादुरोको हत्याको षड्यन्त्र रचेको आरोपमा अमेरिकी नेभी सिल कमान्डोसहित ६ विदेशी नागरिक पक्राउ परेका छन् ।

समाचार संस्था सीएनएनका अनुसार, भेनेजुएलाका गृहमन्त्री डिओसडाडो काबेलोले उक्त षड्यन्त्र अमेरिकी गुप्तचर एजेन्सी सीआईएले रचेको जिकिर गरेका छन् ।

शनिबार आयोजित पत्रकार सम्मेलनमा राष्ट्रपति मादुरोले कमान्डोबाहेक थप दुई अमेरिकी नागरिक, दुई स्पेनी र चेक गणतन्त्रका एक व्यक्तिलाई पक्राउ गरिएको बताए । अधिकारीहरूले ४०० अमेरिकी राइफल पनि बरामद गरेका छन् ।

भेनेजुएलाका गृहमन्त्री काबेलोले स्पेनको राष्ट्रिय गुप्तचर केन्द्र पनि सीआईएसँग मिलेको आरोप लगाएका छन् । अमेरिकी विदेश मन्त्रालयले भने भेनेजुएलाको आरोप अस्वीकार गरेको छ ।

अमेरिकी नागरिकको गिरफ्तारीसँग सम्बन्धित आवश्यक सूचना संकलन गर्ने प्रयास भइरहेको मन्त्रालयले जनाएको छ ।

स्पेनको विदेश मन्त्रालयले पनि भेनेजुएलाबाट पक्राउ परेका नागरिकसँग सम्बन्धित जानकारी मागेको छ ।