काठमाडौं । नवनियुक्त प्रधानसेनापति अशोकराज सिग्देलले विगत द्वन्द्वको समयमा घाइते भएका अवकाश प्राप्त सैनिकलाई सम्मान गरेका छन् । मंगलबार सैनिक मुख्यालय जंगी अड्डामा आयोजित एक कार्यक्रमबीच उनले द्वन्द्वको समयमा घाइते भूतपूर्व सैनिकलाई सम्मान गरेका हुन् ।

कार्यक्रममा प्रधानसेनापति सिग्देलले एकजनालाई चारपांग्रे स्कुटर प्रदान गरे । ३४ जनालाई जनही एक लाख ४० हजार रुपैयाँका दरले आर्थिक सहायता प्रदान गरे ।

सोही कार्यक्रममा प्रधानसेनापतिले ०८० चैत २६ गते डोल्पाको ठूलीभेरी नगरपालिका–४ स्थित तिप्लामष्ट भवानी सामुदायिक वनमा लागेको आगो नियन्त्रणका क्रममा मृत्यु भएका जमदार केशव जार्गामगर र सिपाहीद्वय हेमन्त रावत र आशिक बुढाका परिवारलाई जनही एक लाख ४० हजार रुपैयाँका दरले आर्थिक सहायता प्रदान गरे ।

गिनिज वर्ल्ड रेकर्डमा विभिन्न पाँच विधामा विश्व कीर्तिमान राख्न सफल नेपाली सेनाका प्युठ हरिचन्द्र गिरीलाई पनि प्रधानसेनापतिले एक लाख ५० हजार रुपैयाँ पुरस्कारले सम्मान गरे ।

प्रधानसेनापति सिग्देलले विजेश्वरी ज्ञान मन्दिर सैनिक महाविद्यालयकी छात्रा आइष्मा आचार्यलाई ५१ हजार रुपैयाँ र प्रशंसापत्रसहित सम्मान गरे । आचार्यले ०८० सालको एसईई परीक्षामा उत्कृष्ट नतिजा ल्याउनुका साथै राष्ट्रियस्तरको खेलकुद (एथलेटिक्स विधा)मा विभिन्न समयमा दुई स्वर्ण, एक रजत र एक कांस्यपदक हासिल गरेकी थिइन् ।