काठमाडौं । खाद्य प्रविधि तथा गुण नियन्त्रण विभाग र नेपाल आहारपूरक सौन्दर्यवद्र्धक संघ (एनएनसीए)बीच खाद्यसामग्री व्यवस्थित रूपमा नागरिकसामु पुर्‍याउन सहयोगी भूमिका खेल्ने विषयमा सहमति जुटेको छ ।

विभागका नवनियुक्त महानिर्देशक सञ्जीवकुमार कर्णले एनएनसीएका प्रतिनिधिबाट बधाई ग्रहण गर्दै आहारपूरक खाद्यसामग्रीको बिक्री–वितरणमा सहयोगी भूमिका खेल्ने प्रतिबद्धता जनाए । उनले खाद्य सुरक्षा ऐन लागु भइसकेको अवस्थामा बजारमा देखिएको समस्या समाधान हुने विश्वास व्यक्त गरे ।

उनले भिटामिन, आइनजस्ता आहारपूरक सामग्रीको बिक्री–वितरणमा देखिएका समस्या समाधानका निम्ति अरू सरकारी निकायसँग पनि समन्वय गर्ने एनएनसीएका प्रतिनिधिसँग प्रतिबद्धता जनाए ।

ऐन बनाउने क्रममा समेट्नुपर्ने विषय र व्यवसायलाई सुरक्षित, मर्यादित, अनुशासित र बिरामीकेन्द्रित बनाउन विभागले एनएनसीएसँग निरन्तर छलफल पनि गर्ने भएको छ । बजार अनुगमन बढाएर गलत ढंगबाट व्यापार गर्नेलाई कारबाही गर्ने विभागले जनाएको छ ।

एनएनसीएका अध्यक्ष विप्लव रञ्जितले गुणस्तरीय आहारपूरक वस्तुको आयात गर्ने व्यवसायीको धर्म भएको भन्दै त्यसतर्फ आफूहरू चनाखो रहेको बताए ।

एनएनसीएका महासचिव सुरज पौडेलले व्यवसायीका समस्या समाधानमा गम्भीर बन्न विभागका महानिर्देशक कर्णको ध्यानाकर्षण गराए ।