काठमाडौं । स्वास्थ्य तथा जनसंख्यामन्त्री प्रदीप पौडेलले स्वास्थ्य बिमा सेवालाई प्रभावकारी बनाउन राज्यले स्वास्थ्यका लागि व्यवस्था गरेका सबै सेवा र सहयोग एकीकृत प्रणालीमा ल्याउनुपर्ने बताएका छन् । 

व्यवस्थापिका संसद्को शिक्षा, स्वास्थ्य तथा सूचना प्रविधि समिति बैठकमा सांसदहरू उठाएका प्रश्नको जवाफ दिँदै मन्त्री पौडेलले छरिएका सुविधा प्रभावकारी नहुने बताए । “अहिले सामाजिक सुरक्षा कोष, सुरक्षा निकाय तथा कर्मचारीका बेग्ला बेग्लै बिमा कार्यक्रम छन्,” उनले भने, “राज्यले उपचारका लागि पनि विभिन्न शीर्षकमा खर्च गरिरहेको छ । हाम्रो उद्देश्य यी सबैलाई एकीकृत प्रणालीमा राखेर थप स्रोतको खोजी गर्ने हो ।”

“हाल राज्यको मातहत रहेका सबै बिमा तथा खर्च रकम एउटै प्रणालीमा राख्न सकिए अहिले भन्दा स्रोत बढ्नेछ,” उनले भने, “सबै कर्मचारीले तलबको केही प्रतिशत स्वास्थ्य बिमामा आबद्ध भएर योगदान गर्न सके श्रोत पनि बढ्ने अवस्था आउँछ ।” 

मन्त्री पौडेलले राज्यको योगदान रकम समेत थप गर्न र करमार्फत स्रोत थपेमा स्वास्थ्य बिमा प्रभावकारी बनाउन सकिने विश्वास व्यक्त गरे । उनले स्रोत सुनिश्चिततासँगै बिमाको प्रणालीमा देखिएको गलत दाबीजस्ता समस्या समेत सुधार गर्ने काममा लागिरहेको भन्दै त्यसो भएमा स्वास्थ्य बिमा प्रभावकारी बन्ने बताए । 

हालको एक लाख बिमा रकमले मात्र सेवा प्रभावकारी नहुने भन्दै सेवामा सुधार अनि स्रोतसमेत थप गर्न सके पाँच लाखको बिमा बनाउन सकिने भन्दै त्यसै विश्वासका आधारमा आफू लागि परेको बताए । मन्त्री पौडेलले यस कार्यमा सहयोगका लागि संसदीय समितिसँग समेत आग्रह गरे । 

अस्पताल थप्नुभन्दा भएकालाई सुविधा थप्ने प्रयास
अस्पतालहरूमा जनशक्ति अभावको समस्या रहेको भन्दै नयाँ खोल्नुभन्दा सातवटै प्रदेशका अस्पतालमा विशिष्टिकृत सेवा थप गरेर भएकै जनशक्तिबाट विशिष्ट उपचार दिन प्रयास थालिएको बताए । “क्यान्सरको उपचार सेवा विस्तार भएको छ,” उनले भने, “मृगौला तथा मुटुको उपचारसमेत कम्तीमा एक प्रादेशिक अस्पतालमा विस्तार गर्ने उद्देश्यका साथ काम भैरहेको छ ।” 

स्वास्थ्य जनशक्ति अभावको समस्या समाधान गर्नका लागि दरबन्दी थप गर्न प्रस्ताव लगिए पनि अर्थ मन्त्रालयबाट स्वीकृति नआउने गरेको गुनासो गर्दै मन्त्री पौडेलले दरबन्दी थप गर्न नसक्दासम्म भएकैलाई बढी सुविधा दिएर नागरिकलाई सेवा दिने प्रयासमा सरकार लागेको बताए । 

जनशक्ति नथपिँदासम्म भएकालाई अलि बढी खटिदिन हामीले आग्रह गरेका छौँ, उनले भने, त्यसका लागि अतिरिक्त भएको आम्दानीबाट सुविधा थप गर्ने नीति लिएका छौँ । 

मन्त्री पौडेलले हाल देशमा देखिएको हैजा, झाडापखाला तथा इन्सेफ्लाइटिसजस्ता संक्रमण नियन्त्रणका लागि तीनै तहसँग मिलेर काम गरिरहेको बताए । “हालसम्म तीनवटै तह बेग्ला बेग्लै सरकारका रुपमा काम गरिरहेको अवस्था थियो,” उनले भने, “तर, हामीले पहिलो पटक संक्रमण नियन्त्रणका लागि तीनवटै तहबीच समन्वय गरेर नियन्त्रणका उपाय अपनाएका छौँ ।” 

संघ मातहतका अस्पतालमा अनलाइन प्रणाली सुरु
मन्त्री पौडेलले संघ मातहतका अस्पतालको सेवा प्रभावकारी गराउन प्रयासले काम थालेको भन्दै लाइन घटाउनका लागि अनलाइन प्रणाली सुरु भएको जानकारी दिए । “संघीय अस्पतालमा अनलाइनबाट टिकट र टोकन दिन थालिएको छ,” उनले भने, “अब रिपोर्ट पनि अनलाइन प्रणालीमा लाने प्रयास हुँदैछ ।”

उनले अपरेशनको कुर्ने समय घटाउनका लागि पनि भएकै जनशक्तिलाई सुविधा तथा सिफ्ट बढाउने प्रयास थालिएको समेत जानकारी दिए । 

बैठकमा बोल्ने सांसदहरूले मन्त्री पौडेलले थालेको स्वास्थ्य सुधारका प्रयास सकारात्मक भएको भन्दै सफलताका लागि शुभकामना दिए ।