काठमाडौं । आत्मघाती गोल निर्णायक बन्दा कोसी प्रदेशले राष्ट्रिय महिला लिग–२०२४ मा लगातार दोस्रो जित निकालेको छ । कोसीले बिहीबार सातदोबाटोस्थित एन्फा मुख्यालयमा भएको खेलमा सर्लाहीको वाग्मती युवा क्लबविरुद्ध २–१ को जित निकालेको हो । 

कोसीलाई जित दिलाउन समीक्षा मगरले गोल गरिन् । कोसीले अर्को एक गोल भने वाग्मतीकी दिव्या यस्माली मगरबाट आत्मघाती उपहार पाएको थियो । वाग्मतीकी विष्णुमाया बलले एक गोल गरेकी थिइन् । 

खेलको २६औँ मिनेटमा विष्णुको गोलमा वाग्मतीले अग्रता बनाएको थियो । तर, वाग्मतीको यो अग्रता लामो समय टिक्न भने सकेन । २९औँ मिनेटमा समीक्षाले गोल गर्दै कोसीलाई खेलमा फर्काइन् । 

५४औँ मिनेटमा दिव्याबाट पाएको आत्मघाती गोलमा कोसीले २–१ को अग्रता बनायो । यही गोल निर्णायक बन्दा कोसीले तीन अंक सुनिश्चित गरेको हो । प्रतियोगितामा लगातार दुई जित निकालेको कोसीले ६ अंक जोडेको छ । समान खेल खेलेको वाग्मतीको भने तीन अंक छ ।