काठमाडौं । साउदी अरेबियाका लागि नेपाली राजदूतमा सिफारिस भएका नरेशविक्रम ढकालले नेपाल र साउदीलाई धर्मले पनि जोड्न सकिने बताएका छन् । 

संघीय संसद्को संसदीय सुनुवाइ समितिमा बुधबार सुनुवाइका क्रममा उनले साउदी र नेपालका मुस्लिम समुदायलाई जोडेर काम गर्न सकिने बताएका हुन् । 

“म यसअघि कतारको लागि राजदूत हुँदा धर्म परिवर्तन गरेर माथिल्लो पोस्टमा पुगेको केही नेपाली देखेँ” ढकालले भने, “धर्म परिवर्तन गर्न हाम्रो संविधानले त दिँदैन, तर सम्बन्धित धर्मावलम्बीहरूले फाइदा लिन सक्छन् ।” 

सरकारले आफ्नो नाम फेरि राजदूतमा सिफारिस भएकोमा उनले आफूलाई भाग्यमानी रूपमा समितिमा चित्रण गरेका थिए । 
नेपाल र साउदीबीच उच्चस्तरीय भ्रमण नभएकोले आफू राजदूत भए दुई देशबीच उच्चस्तरीय भ्रमण गराउन पहल गर्ने उनले बताए । 

“नेपाल र साउदीबीच श्रम सम्झौता पुनरावलोकन गर्नुपर्ने छ, यसलाई महत्त्वका साथ लिएको छ,” ढकालले कार्ययोजना प्रस्तुत गर्ने क्रममा भने, “साउदीमा नेपाली दूतावासको आफ्नै भवन छैन, भवन बनाउने मेरो योजना छ ।” 

वैदेशिक रोजगारीका क्रममा साउदी जाने नेपालीलाई सचेतनामूलक कार्यक्रमको आवश्यकता रहेको उनले औंल्याए । साउदीको रहन सहन, संस्कृति, भाषा र कानुन नजान्दा धेरै नेपालीले दुःख पाइरहेको उनले सुनाए ।

“अहिले साउदीका जेलमा ६०० भन्दा बढी नेपाली हुनुहुन्छ,” ढकालले भने । पर्यटन प्रवद्र्धन, व्यापार सन्तुलन, वैदेशिक लगानीलाई विशेष प्राथमिकता दिएर आफू अघि बढ्ने उनले बताए । 

ढकालले कार्ययोजना प्रस्तुत गरेपछि सांसदहरूले उनलाई प्रश्न गरेका थिए । “हामी धेरै अभागी रहेछौँ, तपाईं धेरै भाग्यमानी । त्यसैले तपाईं पटक पटक राजदूत हुनुभयो । तपाईंले म कतारमै बसेर चार वर्ष पूरा गर्छु बीचैमा अर्को देशको राजदूत हुन जान्न भन्न किन सक्नु भएन ?,” समितिमा राष्ट्रिय स्वतन्त्र पार्टीका सांसद डोलप्रसाद अर्यालले भने । 

जवाफमा ढकालले आफूले राजदूत पद कसैसँग नमागेको बताए । उनले भने, “राजदूत पद मागेर पाउने हो वा होइन मलाई थाहा छैन । यसले राम्रो काम गर्न सक्छ भनेर सरकारले दिएको होला भन्ने मेरो बुझाइ हो ।”