काठमाडौं । सांगीतिक ब्यान्ड नेपथ्यले आइतबार बेलुकी अमेरिकाको मेरिल्यान्डमा कन्सर्ट गरेको छ । ‘दी हल एट लाइभ’को हलमा नेपथ्यले कन्सर्ट गरेको हो । 

अमृत गुरुङले सुरुमा ‘कोसीको पानी यो जिन्दगानी’ गाएर कार्यक्रम सुरु गरेका थिए । त्यसपछि उनले ‘भेँडाको ऊन’, ‘छेक्यो छेक्यो’लगायत लोकप्रिय गीत गाएका थिए । 

कन्सर्टमा मुख्य गायक अमृतलाई ड्रमसेटमा ध्रुव लामा, बेस गितारमा सुबिन शाक्य, गितारमा नीरज गुरुङ, मादलमा शान्ति रायमाझी र किबोर्डमा दिनेशराज रेग्मीले सघाएका थिए ।

“आयोजकका रूपमा मेरो जीवनकै यो सबैभन्दा बेस्ट शो भयो,” आयोजक समूहका अभिजित राईले भने, “म आफैँ पनि दर्शकमै मिसिएर कन्सर्टभरि नाचिरहेको थिएँ । कतिपय बेला त खुसीले आँसु थाम्न पनि सकिनँ ।”

अमेरिकामा ६ वटा कन्सर्ट गरिसकेको नेपथ्यले अब सातौँ तथा अन्तिम प्रस्तुतिका लागि पेन्सिलभानियाको ह्यारिसबर्गमा गर्नेछ ।