काठमाडौं । गण्डकीका स्वतन्त्र सांसद राजीव गुरुङ (दीपक मनाङे)ले आफू सरकार टिकाइदिन मन्त्री बनेको बताएका छन् । वन मन्त्रालय पाएपछि असन्तुष्ट बनेका मनाङेले सोमबार नै पदबाट राजीनामा दिएका छन् ।

सोमबार नेकपा (एमाले) सरकारमा सहभागी भएपछि भौतिक पूर्वाधार विकास तथा यातायात व्यवस्था मन्त्रालयको नेतृत्वमा रहेका मनाङेले वन तथा वातावरण मन्त्रालय पाएका थिए ।

राजीनामा दिएपछि सञ्चारकर्मीहरूसँग मनाङेले भने, "म मेरा लागि मन्त्री बनेको होइन । यो सरकार टिकाइदिनका लागि बनेको हो, सरकार त टिकाइ दिनुपर्‍यो ।"

उनले अब आफूलाई मन्त्री बन्न पुसकेको पनि बताए । "अब चाहिँ म मन्त्री नबन्ने, मलाई पुगिसक्यो । ...मन्त्रीमात्र बनेर के हुन्छ ? एउटा गाडीमा झन्डामात्र हल्लाएर काम छैन । मान्छेलाई बेकुफ बनाएको जस्तो मात्रै हो," उनले भने ।

उनले आफूले कांग्रेस र एमाले दुवै दलको सरकार बनाइदिएकाले उनीहरू रिसाउन नपाउने बताए ।

"अब बल्ल म स्वतन्त्र भएँ । एमालेका लागि पनि सरकार बनाइदिएँ । त्यसैले एमाले पनि मसँग रिसाउन पाउँदैन । कांग्रेसलाई पनि सरकार बनाइदिएकै हो, उनीहरू पनि रिसाउन पाउँदैन । म स्वतन्त्ररूपले बस्छु," उनले भने ।