काठमाडौं । नेपाली बजारमा सबैभन्दा धेरै चिनियाँ विद्युतीय सवारी (ईभी) ब्रान्ड देखिएका छन् । हालै सम्पन्न नाडा अटोमोबाइल्स एसोसिएनसनको नाडा अटो शोमा पनि चिनियाँ ईभी ब्रान्डकै वर्चश्व देखिएको छ । 

विभिन्न तथ्यांकअनुसार विश्वकै ईभी बजारमा चीनको हिस्सा आधाभन्दा बढी छ । नेपालमा भने ब्रान्ड संख्याका आधारमा हेर्ने हो भने करिब ८० प्रतिशत चिनियाँ ईभी देखिएका हुन् ।

नाडा अटो शोकै तथ्यांकलाई आधार मान्ने हो भने पनि चिनियाँ ईभी ब्रान्डको बाक्लो उपस्थिति देखिन्छ । नेपालमा सबैभन्दा धेरै चर्चामा रहेको चिनियाँ ईभी ब्रान्ड बीवाईडी, दिपल, स्काईवेल, नेटालगायत नै हुन् ।

अन्य देशका चर्चित ब्रान्डमा पहिलो भारतीय टाटा मोटर्स छ । यस्तै, बेलायतमा स्थापित हाल चिनियाँ सरकारी स्वामित्वको कम्पनी एसएआईसीको नियन्त्रणमा रहेको एमजी, दक्षिण कोरियाली ब्रान्ड हुन्डाई र किया एवं फ्रान्सेली ब्रान्ड सिट्रोनका ईभी नेपाली बजारमा छन् ।

सबैभन्दा धेरै चिनियाँ
चीन बाहिरका केही ब्रान्डबाहेक नेपालमा दुई दर्जन बढी चिनियाँ ईभी ब्रान्ड छन् । तीमध्ये नाडा अटो शोमा देखिएका ब्रान्डमा बीवाईडी, दिपल, स्काईवेल, नेटा, आयोन, सेरेस र डोङफेङको नामी छ । यस्तै, लिपमोटर, रिड्डारा, एक्स–पेंङ, अवतार, जिकर, ओमोडा, केई, जेकु, वुलिङ र बीएडब्ल्यू ईभी ब्रान्ड नाडा अटो शोमा प्रर्दशनीमा थिए ।

विश्वकै सबैभन्दा ठूलो ईभी ब्याट्री निर्माता कम्पनी पनि चीनमै छ । चीनको सीएटीएल कम्पनीले उत्पादन गर्ने ईभी ब्याट्रीहरू विभिन्न ब्रान्डले प्रयोग गर्छन् ।

सीएटीएलकै ब्याट्री विश्वका अन्य प्रख्यात ब्रान्ड टेस्ला, भोक्सवागन, बीएमडब्ल्यू लगायतले पनि प्रयोग गर्छन् । ईभीको एक महत्त्वपूर्ण हिस्सा ब्याट्रीको उत्पादन चीनमै हुँदा सीएटीएलकै ब्याट्री प्रयोग गरेर त्यहाँ धेरै ईभी ब्रान्ड उदाइरहेको देखिन्छ ।

नेपालमा बढी जसो चिनियाँ ब्रान्ड भित्रिँदै गर्दा यी गाडीको गुणस्तरको विषयलाई लिएर टिप्पणी हुने गरेको छ । तर, नेपाल भित्रिने गाडीहरूको गुणस्तर मापन गर्ने काम सरकारले गरेको छैन । यस्तो कस्तो र कुन किसिमका गाडीहरू मात्रै भित्र्याउन पाइने भन्ने किसिमको मापदण्ड पनि छैन ।

यी ब्रान्डका नेपालका लागि आधिकारिक वितरक कम्पनीहरूले उच्च सुरक्षा, गुणस्तर र क्षमता भएका गाडी भित्र्याउने बताउँदै आएका छन् ।