काठमाडौं । राष्ट्रिय मानव अधिकार आयोगले पाँचथर विष्फोटको घटनामा परेका परिवारलाई क्षतिपूर्ति दिन र घटनाको छानबिन गर्न सरकारलाई निर्देशन दिएको छ ।

पाँचथरको फालेलुङ गाउँपालिका–५, डाँडागाउँस्थित आइतराज केरुडको घरमा बिहीबार विष्फोटक पदार्थ विष्फोट हुँदा दुई वर्षीया प्रिन्सा साँवा र ११ वर्षीय दिप्सन साँवाको ज्यान गएको थियो । विष्फोटमा १० वर्षीय पवन राई र सात वर्षीय दिपशन राई घाइते भएका छन् ।

आयोगको कोसी प्रदेश कार्यालयले घटनाको अनुगमन गरिरहेको बताउँदै आयोगले भनेको छ, "आयोगले पटकपटक यस प्रकारका विष्फोटक पदार्थ हटाउन र त्यसको प्रगति आयोगमा जानकारी गराउन सिफारिससमेत गरेको सन्दर्भमा विष्फोटको घटनाबाट बालबालिकाले ज्यान गुमाउनुपर्ने अवस्थाको सिर्जना हुनु अत्यन्त दुःखद हो ।"

घटनाको छानबिन गरेर दोषीलाई कारबाही गर्न र घाइतेलाई उपचारको व्यवस्था मिलाउन पनि आयोगले निर्देशन दिएको छ । आयोगले जारी गरेको विज्ञप्तिमा लेखिएको छ, "निर्दोष बालबालिकाको ज्यान जाने गरी भएको उक्त घटनाको निष्पक्ष छानबिन गरी दोषीलाई कारबाही गर्न, घाइतेको नि:शुल्क र प्रभावकारी उपचारको व्यवस्था मिलाउन, घाइते तथा मृतकका परिवारलाई क्षतिपूर्तिको व्यवस्था गर्न र जथाभाबी छोडिएका यस्ता विष्फोटक पदार्थहरू निष्क्रिय पारी पुनः यस प्रकारका घटना दोहोरिन नदिन आयोग नेपाल सरकारलाई निर्देशन गर्दछ ।"