काठमाडौं । राष्ट्रपति रामचन्द्र पौडेललाई सर्वसाधारणले गैरजिम्मेवारीपन बढेको भन्दै अविभावकत्व लिन सुझाव दिएका छन् । धेरै नागरिक लडेर ल्याएको संघीय लोकतान्त्रिक गणतन्त्र नेताहरूको गैरजिम्मेवारीका कारण संकटमा पर्न लागेको भन्दै उनीहरूले अविभावकत्व लिन आग्रह गरेका हुन् । 

महिनामा एकपटक सार्वजनिकस्थलमा जाने कार्यक्रम राखेका राष्ट्रपति पौडेल शुक्रबार भक्तपुर दरवार क्षेत्रको भ्रमणमा पुगेका थिए । त्यहाँ रहेको सर्वसाधारणले राष्ट्रपतिलाई अविभावकत्व लिन आग्रह गरेका हुन् । 

“राष्ट्रपतिज्यू हाम्रो धेरै ठूलो संघर्षबाट आएको संघीय लोकतान्त्रिक गणतन्त्रमाथि नेताहरूको गैरजिम्मेवारीले प्रश्न उठ्दैछ,” दरवार क्षेत्रमै उपस्थित एक सर्वसाधारणले भने, “तपाईं यो देशको अविभावक हो । नेताहरूको गैरजिम्मेवारी रोक्न पहल गरिदिनुस् ।” 

जवाफमा राष्ट्रपतिले आफूले शासन गर्ने नेताहरूलाई ध्यानाकर्षण गराउने बताए । “शासन सम्हालेका नेताहरू लाई म भन्नेछु,” राष्ट्रपतिले यतिमात्र जवाफ फर्काएका थिए । 

राष्ट्रपति पौडेले राष्ट्रिय सम्पदाको निरीक्षण, सर्वसाधारणको जीवन शैली, नागरिकको अवस्थासहितका विषयमा थप जानकारी लिनेगरी प्रत्यक महिना एउटा सार्वजनिक स्थलमा जाने कार्यक्रम बनाएर आज भक्तपुर दरवार क्षेत्र पुगेका हुन् । उनले हरेक महिना नयाँ क्षेत्रमा जाने कार्यक्रम बनाएका छन् ।