काठमाडौं । स्टार खेलाडीले भरिएको रियाल मड्रिड स्पेनिस ला लिगामा पुनः रोकिएको छ । ला लिगाअन्तर्गत बिहीबार राति लास पाल्मासले रियाललाई १–१ को बराबरीमा रोकेको हो ।

ग्रान कानारियामा अल्बर्टो मोलेइरोले गोल गर्दै पाल्मासलाई अग्रतामा राखेका थिए । तर, ६९औँ मिनेटमा पाएको पेनाल्टीलाई भिनिसियस जुनियरले सदुपयोग गरेपछि रियालले हार टारेको हो ।

ला लिगाका तीन खेल खेल्दा रियाल दोस्रोपटक बराबरीमा रोकिएको हो । लिगको पहिलो खेलमा रियाल मायोर्कासँग १–१ को बराबरीमा रोकिएको थियो । रियालले दोस्रो खेलमा भालाडोलिडविरुद्ध ३–० को जित निकालेको थियो ।

तीन खेलबाट पाँच अंक जोडेको रियाल तालिकाको पाँचौँ स्थानमा छ । समान खेलबाट दुई अंकको पाल्मास १६औँ स्थानमा छ ।