काठमाडौं । यस पटकको ‘नाडा अटो शो’मा पेट्रोलियम इन्धनका गाडी निकै कम देखिएका छन् । 

अघिल्ला वर्षका शोहरुमा निरन्तर विद्युतीय सवारी (ईभी) को प्रदर्शनी बढ्दो र इन्टरनल कम्बस्चन इन्जिन (आईसीई) को प्रदर्शनी घट्दै गएको थियो ।

बजारमा समेत आक्रामक रुपमा ईभीकै माग बढ्दो छ । यस्तो अवस्थामा यसपटकको नाडा अटो शोमा आईसीई गाडीहरु निकै कम देखिनुले ईभीले पेट्रोलियम इन्धनका गाडीलाई चाँडै नै पूर्णरुपमै विस्तार गर्नसक्ने संकेत गरेको छ ।

शोमा विभिन्न कम्पनीले प्रदर्शनीमा राखेका ३० वटा चार पाङ्ग्रे बान्डमा महिन्द्रा र सुजुकीको मात्रै आईसीई गाडी छन् । 

अग्नि इन्कर्पाेरेटेडले महिन्द्राका गाडीहरु बिक्री तथा प्रदर्शनीमा राखेको छ । यस्तै सूर्य अटोमोबाइल्सले सुजुकीका गाडी बिक्रीमा राखेको छ । यी दुई बाहेकका अन्य आईसीई गाडी बिक्री गर्ने कम्पनीहरुले ईभीलाई नै बढी प्राथमिकता दिएका छन् र ईभी नै विशेषरुपमा प्रदर्शनीमा राखेका छन् ।

शोमा टाटा, हुन्डाई, एमजी र कियाले पनि ईभी गाडीलाई प्राथमिकता दिएका छन् । प्रदर्शनीमा राखिएका अन्य सबै ब्रान्डहरु पूर्णरुपमा ईभी ब्रान्ड नै छन् । 

ईभी नै प्रदर्शनीमा राखिरहेका ब्रान्ड तथा मोडलमा बीवाईडी, स्काईवेल, नेटा, आयोन, सेरेस, नामी, लिपमोटर, रिड्डारा, सिट्रोन, एक्स–पेङ, अवतार, दिपल, जिकर, ओमोडा, केई, जेकु, हेन्री भोल्ट्स र बीएडब्ल्यू छन् ।

यसरी नाडा अटो शोमा आईसीईतर्फ पूरानो इतिहास बोकेका गाडीहरु कम देखिएका हुन् ।

कर्मसियलदेखि ढुवानी पनि ईभी

नाडा अटो शोमा प्रदर्शनीमा राखिएका हलुवा व्यावसायिक गाडीहरु पनि ईभी ब्रान्ड नै छन् ।  किङलङ, केवाईसी, फोटोनलगायतका कर्मसियल गाडीहरु विद्युतीय नै छन् ।  यस्तै साना ढुवानीका ट्रक पनि विद्युतीय छन् ।
दुई पाङ्ग्रेमा विद्युतीय स्कुटरको बढी चहलपहल देखिए पनि बाइकहरु भने पेट्रोलियम इन्धनकै प्राथमिकतामा छन् ।

नाडा अटो मोबाइल्स एसोसिएसन अफ नेपालले आयोजना गरेको शो काठमाडौंको भृकुटीमण्डपमा चलिरहेको छ ।  यसै मंगलबार भदौ ११ गतेदेखि सुरु भएको अटो शो भदौ १६ गतेसम्म चल्दैछ । शोमा विभिन्न ब्रान्डका चार पाङ्ग्रे तथा दुई पाङ्ग्रे सवारीसाधनहरु राखिएका छन् ।