काठमाडौं । नेकपा एमालेको साहित्य, कला तथा संस्कृति विभाग तथा मोतीदेवी स्मृति केन्द्रको आयोजनामा ‘तिज कसरी मनाउने ?’ विषयक छलफल कार्यक्रम सम्पन्न भएको छ ।

शुक्रबार पुतलीसडकमा आयोजित कार्यक्रममा साहित्यकार डा. रजनी ढकालले ‘आजको सन्दर्भमा तिज कसरी मनाउने’ विषयक अवधारणापत्र प्रस्तुत गरिन् ।

अवधारणापत्र प्रस्तुत गर्दै तिज लोकप्रिय संस्कृतिका रूपमा स्थापित रहेकोले यसमा सबै चेलीबेटी रमाउन चाहने उल्लेख गरिन् । नागपञ्चमीदेखि ऋषिपञ्चमीसम्म तिज गीत गाउने परम्पराको पनि चर्चा गरिन् ।

उनले आफ्ना केही बाल्यकालीन प्रसंगहरूको स्मरण गर्दै त्यस बखतका तिज गीतले महिलाका जीवनका अनेकन बिम्बहरूलाई प्रस्तुत गर्दै आएको बताइन् ।

उनले आमसञ्चारले अहिलेका अश्लील तिज गीतहरूलाई बढावा दिएको भन्दै त्यस्ता गीतहरूमा सरोकारवाला निकायबाट नियन्त्रण गरिनुपर्नेमा जोड दिइन् ।

उनले तिज र सामाजिक सांस्कृतिक सन्दर्भ, तिजकोे मौलिकताको चर्चा गर्दै यस विषयमा अझ बृहत् छलफल हुनुपर्नेमा जोड दिइन् ।

सञ्चारकर्मी आरती चटौतले चाडपर्वमा एक किसिमको मनोविज्ञान जोडिने प्रसंग उठाउँदै परिवर्तनका लागि मनोविज्ञानमा समेत परिवर्तन हुनुपर्ने बताइन् । चटौतले आमसञ्चारले अश्लील गीत बढावा दिएको सन्दर्भ उठाउँदै त्यस्ता गीत क्लिक पनि नगर्ने र लाइक सेयर पनि नगर्ने हो भने ती आफैं हराउने बताइन् । उनले तिज महिलाहरूले आफ्नै किसिमले मनाउनु पर्नेमा जोड दिइन् ।

डा. ढकालको अवधारणापत्रमाथि प्रा. जगतप्रसाद उपाध्यायले टिप्पणी गरे ।

नेकपा एमालेका सांसद रघुजी पन्तले कार्यक्रमको उद्देश्यमाथि प्रकाश पारेका थिए ।

कार्यक्रममा एमाले उपाध्यक्ष तथा मोतीदेवी स्मृति केन्द्रका अध्यक्ष अष्टलक्ष्मी शाक्य, ममता गिरीलगायतले बोलेकी थिइन् ।