काठमाडौं । राष्ट्रियसभामा नेकपा (माओवादी केन्द्र)का सांसद नारायणकाजी श्रेष्ठले सरकारले बेपत्ता पारिएका व्यक्तिको छानबिन आयोग गठनमा ढिलाइ गर्नु नहुने बताएका छन् । बिहीबार राष्ट्रियसभा बैठकमा प्रतिनिधिसभाबाट सन्देशसहित बेपत्ता पारिएका व्यक्तिको छानबिन, सत्यनिरुपण तथा मेलमिलाप आयोग (तेस्रो संशोधन) विधेयक, २०७९ माथिको दफावार छलफलका क्रममा उनले यस्तो बताएका हुन् ।

संघीय संसद्का दुवै सदनबाट विधेयक पारित भइसकेपछि राष्ट्रपतिले प्रमाणीकरण गरेसँगै आयोग गठनको काम थालिनुपर्नेमा उनले जोड दिए । उनले बेपत्ता पारिएका व्यक्तिको छानबिन र सत्यनिरुपण तथा मेलमिलाप आयोग बनाउन ढिलाइ गर्नु नहुने बताए ।

“...जब संशोधन विधेयक पारित भएर राष्ट्रपतिको सही भइसक्छ, त्यसपछि यसलाई तत्काल आयोग बनाउने प्रक्रियामा लैजानुपर्छ,” उनले भने, “आयोग सिफारिसको सम्बन्धमा पहिला नै पूर्वन्यायाधीशको नेतृत्वमा एउटा कमिटी छ ।”

विधेयक पारित गर्नु मात्र ठूलो विषय नभएको भन्दै उनले त्यसपछि पनि धेरै चुनौतीपूर्ण काम बाँकी रहने उल्लेख गरे ।

सांसद श्रेष्ठले सामाजिक, आर्थिक रूपान्तरण, विकास, समृद्धिको दिशामा सबै राजनीतिक दल एक हुनुपर्ने बताए । न्युज एजेन्सी नेपाल