काठमाडौं । नेकपा (माओवादी) केन्द्रका सांसद लेखनाथ दाहालले सिन्धुली–खुर्कोट ३९ किलोमिटरको सडकमा सुरुङमार्ग निर्माणकार्य तत्काल थाल्न आग्रह गरेका छन् । बिहीबार प्रतिनिधिसभा बैठकमा उनले उक्त सडक घुमाउरो भएकाले यात्रु बिरामी हुने गरेका बताए ।

सुरुङमार्ग बनाउँदा त्यहाँ ३१ किलोमिटर सडक छोटो हुने उनले उल्लेख गरे । “हरेक दिन दुर्घटना हुन्छ । बीपी लोकमार्ग नभएर मृत्युमार्ग बनेको छ । सुरुङमार्ग निर्माण गर्दा ८.४ किलोमिटरमा यात्रा गर्न सकिन्छ । ३१ किलोमिटर सडक छोटो हुन्छ,” उनले भने ।

चालु आर्थिक वर्षमा केही बजेट छुट्ट्याइएकाले छिटै काम सुरु गर्न उनले आग्रह गरे । “सुरुङमार्ग आर्थिक साझेदारी संस्था खोजेर तत्काल निर्माणकार्य तत्काल अघि बढाइयोस्,” उनले भने ।

सुरुङमार्ग बनाइए मानवीय क्षति कम हुने र करोडौँ पुँजी बचत हुने उनको भनाइ छ ।