काठमाडौं । लघुकथा समाज, नेपालले आफ्नो १७ औं वार्षिकोत्सवको अवसर पारेर हेटौंडाका कवि तथा लघुकथाकार आरआर चौलागाईंलाई ‘पूर्णप्रसाद ब्राह्मण लघुकथा सम्मान २०८१’ प्रदान गरेको छ ।

बुधबार सर्वनाममा आयोजित कार्यक्रममा प्रमुख अतिथि साहित्यकार तथा नाट्यकर्मी अशेष मल्लले चौलागाईंलाई सम्मानित गरे । सर्जकलाई सम्मानित गर्दै मल्लले विसं.२०३१ सालमा विराटनगरमा पढ्दा सर्जक साथीहरू मिलेर लघुकथाको किताब निकालेको स्मरण गरे । 

त्यो समय लघुकथा भन्ने चलन थिएन । त्यसैले ती छोटा कथाको नाम भाषाशास्त्री बालकृष्ण पोखरेलले ‘रेच्की गल्प’ राखिदिएको उनले स्मरण गरे ।  उनले भने, “आज लघुकथा विधा स्थापित भइसकेको छ । आजको समयमा हामीले प्रविधिको सही सदुपयोग गरेर राम्रा रचना पाठकका लागि पस्कन सक्नुपर्छ । तर म देख्छु, यहाँ त किताब निकाल्ने हतारो र होड चलेको छ ।” 

पूर्णप्रसाद ब्राह्मण लघुकथा सम्मानका संस्थापक समेत रहेका समाजका पूर्व अध्यक्ष श्रीओम श्रेष्ठ रोदनले लघुकथा लोकप्रिय भएकाले यसमा विकृति नआओस् भन्दै लघुकथाकार आफैँ सचेत हुनुपर्नेमा जोड दिए ।

३० को दसकदेखि कविता सिर्जनामा सक्रिय रहँदै आएका चौलागाईंले लघुकथा २०५० देखि मात्रै लघुकथा लेख्न थालेको बताए ।