काठमाडौं । नेपाल विद्युत् प्राधिकरणका कार्यकारी निर्देशक कुलमान घिसिङले छिट्टै मुलुकमा शतप्रतिशत विद्युतीकरण घोषणा हुने बताएका छन् । शनिबार विद्युत् प्राधिकरणको ३९औँ वार्षिकोत्सव कार्यक्रममा उनले मुलुकमा शतप्रतिशत विद्युतीकरण भएको घोषणा हुने अवस्थामा पुगेको बताएका हुन् ।

आठ वर्षअघि करिब ५८ प्रतिशत घरधुरीमा मात्र विद्युत् पुगेको उनले उल्लेख गरे । विद्युत् सेवा हाल करिब ९९ प्रतिशतभन्दा बढीमा पुगेको भन्दै उनले सरकारले सञ्चालन गरेको ‘उज्यालो नेपाल’ अभियानको सबैभन्दा ठूलो सफलता नै यही भएको बताए ।

कार्यकारी निर्देशक घिसिङले प्राकृतिक र प्राविधिक कारणले केही क्षण बत्ती जाने र आउने हुने गरेको बताए । लोडसेडिङ भने इतिहासको विषय भइसकेको उनले सुनाए ।

उनले वर्षायाममा भारततर्फ विद्युत् निर्यात गरी उल्लेख्य विदेशी मुद्रा आर्जन र व्यापार घाटा कम गर्न सक्ने अवस्थामा पुगेको जानकारी गराए ।

कार्यक्रममा कुलमान घिसिङको भनाइ पढ्नोस्–
आठ वर्षअघि वर्षायाममा समेत दैनिक आठ/नौ घण्टा र सुक्खायाममा १८ घण्टासम्म लोडसेडिङ भोग्नुपरेको कहालीलाग्दो अवस्थाबाट हाल वर्षायाममा देशभित्र खपत गरी बढी भएको विद्युत् दैनिक ७०० मेगावाटभन्दा बढी निर्यात हुने अवस्थामा पुगेका छौँ । २०७३ सालको तिहारको लक्ष्मीपूजाको दिनदेखि काठमाडौं उपत्यकाबाट प्रारम्भ गरिएको लोडसेडिङ अन्त्यको अभियानबाट २०७५ वैशाखबाट मुलुकभर लोडसेडिङ अन्त्य गर्न सफल भएका थियौँ । प्राकृतिक र प्राविधिक कारणले यदाकदा केही क्षण बत्ती जाने, आउने गरेता पनि हामी गर्वका साथ भन्न सक्छौँ– लोडसेडिङ अब इतिहास भइसकेको छ । त्यति मात्र होइन, वर्षायाममा भारततर्फ विद्युत् निर्यात गरी उल्लेख्य विदेशी मुद्रा आर्जन गर्न र व्यापार घाटा कम गर्न सक्ने अवस्थामा हामी पुगेका छौँ । हिउँदयाममा अझै केही महिना विद्युत् आयात गर्नु परेता पनि आयातको परिणाम क्रमशः घट्दै जानेछ । गत आर्थिक वर्षबाट देशभित्र खपत गरी बढी भएको विद्युत् भारतीय बजारमा बिक्री गरी खुद आयातकर्ताबाट खुद निर्यातकर्ता बनेर नेपालले गौरवमय इतिहास बनाइसकेको छ । आठ वर्षअघि करिब ५८ प्रतिशत घरधुरीमा मात्र पुगेको विद्युत् सेवा अहिले करिब ९९ प्रतिशतभन्दा बढीमा पुगेको छ । सरकारले सञ्चालन गरेको उज्यालो नेपाल अभियानको यो नै सबभन्दा ठूलो सफलता हो । अब छिट्टै मुलुक शतप्रतिशत विद्युतीकरण घोषणा गर्ने अवस्थामा पुगेको छ । न्युज एजेन्सी नेपाल