काठमाडौं । विशेष अदालतले मुगुको सोरु गाउँपालिका–५ स्थित नेर सिँचाइ आयोजनामा भ्रष्टाचार भएको ठहर गरेको छ । विशेष अदालतका न्यायाधीश खुशीप्रसाद थारु, रामबहादुर श्रेष्ठ र मुरारीबाबु श्रेष्ठको इजलासले आइतबार तत्कालीन उपभोक्ता समितिका अध्यक्ष तेजबहादुर शाही, उपाध्यक्ष हिराबहादुर शाही र सचिव तीर्थबहादुर शाहीलाई भ्रष्टाचार मुद्दामा दोषी ठहर गरेको हो ।

अख्तियार दुरुपयोग अनुसन्धान आयोगले पाँच लाख ६१ हजार रुपैयाँ बिगो कायम गरी मुद्दा दायर गरेको थियो । विशेष अदालतले उनीहरूलाई दामासाहीमा एक लाख १२ हजार २९६ रुपैयाँ ३९ पैसा जरिवाना हुने फैसला गरेको छ ।

उपभोक्ता समितिका प्रतिनिधिले लागत अनुमानभन्दा कम काम गरी फिल्डमा नभएको कार्य पनि भएको भन्दै भुक्तानीका निम्ति झुटो बिल पेस गरेका थिए । आर्थिक वर्ष २०७८/०७९ मा उक्त आयोजनाको पाइपलाइनको काम एक हजार ७०० मिटर हुनुपर्नेमा ८१२.५ मिटर मात्र बनाइएको थियो । ८८७.५ मिटर नभएको कामको झुटो बिल पेस गरिएको थियो । भुक्तानीको सबै रकम भ्रष्टाचार भएको भन्दै उनीहरूलाई बिगो कायम गरिएको थियो ।

उनीहरूलाई भुक्तानी दिने खानेपानी, सिँचाइ तथा ऊर्जा विकास कार्यालय मुगुका प्रमुख राजीव रिमाललाई भने एक लाख १२ हजार २९६ रुपैयाँ जरिवाना र थप तीन महिना कैदको फैसला भएको छ ।

यस्तै, आयोजनाका सबइन्जिनियर नरबहादुर लावडलाई झुटो नापी तयार पार्न सघाएको ठहरसहित एक लाख १२ हजार २९६ रुपैयाँ ३९ पैसा जरिवाना र थप ६ महिना कैद तथा थप १० हजार रुपैयाँ जरिवाना हुने फैसला भएको छ ।