काठमाडौं । नेपाली कांग्रेसका केन्द्रीय सदस्य गोविन्द पोखरेलले वर्तमान सरकारले जनतामा आशा जगाउने छनक नदेखाएको टिप्पणी गरेका छन् । पार्टी केन्द्रीय समितिको आइतबार बसेको बैठकमा उनले वर्तमान सरकारमा पठाइएका मन्त्री, मधेस प्रदेशमा मन्त्रिपरिषद्को आकार, विभिन्न नियुक्ति, सरुवाबारे पनि नागरिक तहमा व्यापक आलोचना भएको बताए । 

“१०० दिन नपुग्दै समाजमा यो सरकारले आशा जगाउन सक्दैन कि भन्ने संशय पैदा भएको छ । त्यसैले हामीले बनाएका आर्थिक, सामाजिक र लोकतान्त्रिक संरचनाहरूका कमजोरीले भन्दा पनि राजनीति दलका नेतृत्वको कार्यशैलीबारे गरिएका टीकाटिप्पणीलाई मनन गरेर जनताको भावनाअनुसार सुधारिएर काम नगर्ने हो भने हामीले श्रीलंका र बंगलादेशको नियति भोग्न नपर्ला भन्न सकिँदैन‚” बैठकमा उनले भने ।

नयाँ गठबन्धनपश्चात् पुँजीबजार गतिशील हुनु राम्रो संकेत भएको उनले उल्लेख गरे । यसको गतिशीलताबाट सरकारले भनेजति फाइदा लिन नसकेको उनको भनाइ थियो ।

उनले भने‚“छिमेकी मुलुक भारतमा जहाँ पुँजीबजारको प्रणाली हाम्रोभन्दा बढी सबल छ, त्यहाँ पुँजीको लाभकर एक वर्षभन्दा कमको २०% र एक वर्षभन्दा बढीको १२.५% छ । जबकि, नेपालमा त्यो ७.५% र ५% छ । यसको मतलब पुँजीबजारमा दिनमा केही व्यक्तिले लाखौँ कमाएका पनि छन्, तर तिनले जम्मा ७.५% मात्र कर तिरे पुग्ने नीतिगत व्यवस्था छ ।”