काठमाडौं । सिमकोट–लिमी–लाप्चा सडक सधैँ चल्न सक्ने गरी निर्माण गरिने भएको छ । लिमीवासीसँगको भेटमा उपप्रधान एवं अर्थमन्त्री विष्णुप्रसाद पौडेलले सिमकोट–लिमी–लाप्चा सडकलाई महत्त्व दिएर सम्पन्न गर्ने बताएका हुन् ।

नेपालको सबैभन्दा ठूलो गाउँपालिका नाम्खामा पर्ने लिमी उपत्यकाबाट मानसरोवरको दर्शन गर्न सकिन्छ । अहिले प्रयोग गरिएको सडक ६ महिना चल्ने र हिउँ पर्न थालेपछि बन्द हुन्छ । त्यसैले लिमीवासीले सधैँ चल्न सक्ने सडक बनाउन सरकारसँग माग गरेका हुन् ।

झन्डै ६ महिना यातायात सेवाबाट वञ्चित हुँदै आएका लिमी उपत्यकावासी उक्त समयमा राज्यको पहुँचबाहिर हुन्छन् । लिमी–लाप्चा र सिमकोट–हिल्साका दुवै सडकखण्डका नारापास र न्यालुपास पाँच हजार मिटर अग्लो उचाइमा छन् । हिउँदको समयमा ६ महिना हिउँले ढाकिएर उक्त बाटो अवरुद्ध हुन्छ । त्यसको विकल्पमा नाम्खा गाउँपालिकाको तुम्कोट खोलादेखि ककुवा हुँदै हिल्सासम्म करिब २९ किलोमिटर दूरीको कर्णाली नदीको तिरैतिर तुम्कोट–लिमी–हिल्साखण्डको बाटो विस्तारका निम्ति आवश्यक बजेटको व्यवस्था गर्न उनीहरूले माग गरे ।

अर्थमन्त्री पौडेलले सुरक्षा संवेदनशील र पर्यटकीय महत्त्व बोकेको लिमी उपत्यका र त्यहाँका बासिन्दालाई निराश नबनाई काम गर्ने प्रतिबद्धता व्यक्त गरे । लिमी उपत्यकालाई राष्ट्रिय सडक सञ्जालमा जोड्न सरकारले प्राथमिकताका साथ काम गर्ने उनले उल्लेख गरे । हिल्सा नाकालाई सहज ढंगले आवतजावत गर्न सक्ने बनाउनुपर्ने उनको भनाइ छ ।

अर्थमन्त्रीलाई लिमी उपत्यकावासीले किसानलाई जीविकोपार्जनका निम्ति विशेष अनुदानको व्यवस्था गर्न पनि ध्यानाकर्षण गराए । पर्यटकीय उपत्यका भएकाले कैलाश मानसरोवर दर्शन गर्ने स्थानको लाप्चामा हाइलाइन पार्क (मन्दिर, गुम्बासहित दर्शन गर्न मिल्ने संरचना) बनाउन आवश्यक अध्ययन–अनुसन्धानसहित बजेट व्यवस्थापन गर्न आग्रह गरिएको छ । यसले पर्यटक प्रवर्द्धनमा मद्दत पुग्नुका साथै स्थानीयवासीको आय–आर्जनमा वृद्धि हुने भएकाले जीविकोपार्जनमा सहयोग पुग्ने अपेक्षा लिइएको स्थानीयको भनाइ छ ।

उनीहरूले ‘जलवायु न्याय विशेष कार्यक्रम’ सञ्चालन गर्न समेत आग्रह गरे । न्युज एजेन्सी नेपाल