काठमाडौं । भारतीय विदेशमन्त्री एस जयशंकरले शुक्रबार लोकसभामा रुसी सेनामा भर्ती भएका भारतीयका बारेमा जानकारी दिएका छन् । विदेशमन्त्री जयशंकरले लोकसभामा भने, “९१ जना भारतीय रुसी सेनामा भर्ती भएका थिए, जसमध्ये आठजनाको मृत्यु भैसकेको छ ।”

रुसी सेनामा भर्ती भएका १४ भारतीयलाई भारत सरकारको सहयोगमा उद्धार गरी रुसबाट बाहिर ल्याइएको उनले बताए । अझै पनि रुसी सेनामा भर्ती भएका ६९ भारतीय उद्धारको पर्खाइमा रहेको उनले लोकसभालाई जानकारी दिए । “रुसी सेनामा भारतीयको भर्तीलाई हामीले गम्भीर रूपमा लिएका छौँ । मैले रुसी विदेशमन्त्रीसँग पटक पटक यो मुद्दा उठाएको छु,” उनले भने ।

गत महिना भारतीय प्रधानमन्त्री नरेन्द्र मोदीले रुसको भ्रमण गर्दा रुसी राष्ट्रपति भ्ल्यादिमिर पुटिनसँग पनि यस मुद्दालाई उठाएको उनले जनाए । भारतीयलाई स्वदेश फिर्ता पठाउन आश्वासन पुटिनले दिएको विदेशमन्त्री जयशंकरले बताए ।
भारतीय नागरिकहरूले रूसी सेनासँग सेवाको लागि सम्झौतामा हस्ताक्षर गरेका कारण समस्या आएको बुझाई रुसी पक्षको रहेको उनले जनाए । “तर हामी त्यो विश्वास गर्दैनौँ, मलाई लाग्छ कि हाम्रा नागरिकहरूलाई बहकाइएको थियो । उनीहरूलाई अर्कै कामको लागि भनि लगियो र रूसी सेनामा भर्ती गरियो,” उनले भने ।

सीबीआईले १९ व्यक्ति र संस्थाविरुद्ध फौजदारी मुद्दा दर्ता गरेको विदेशमन्त्री जयशंकरले बताए । रुसबाट फर्किएका १४ जनामाथि पनि अनुसन्धान भइरहेको उनले जनाए । १० मानवतस्कर विरुद्ध पर्याप्त प्रमाण फेला परेको पनि उनले बताएका छन् ।  

यस मुद्दाको अनुसन्धानका क्रममा गत अप्रिल २४ मा २ जना र मे ७ मा थप २ जनालाई पक्राउ गरिएको थियो । आरोपित चारै जना अहिले न्यायिक हिरासतमा रहेको उनले जनाए ।