काठमाडौं । नेपाली कांग्रेसको केन्द्रीय समितिको बैठकमा नेताहरूले सरकार सञ्चालन, संविधान संशोधन, गठबन्धनको औचित्य र पार्टीको आन्तरिक समस्यासहितका विषयमा धारणा राखेका छन् ।

जारी बैठकको दोस्रो दिन आज कांग्रेस केन्द्रीय सदस्य डिला संग्रौलाले सरकारलाई प्रभावकारी बनाउन संयन्त्र बनाउनुपर्ने आवश्यकता औँल्याइन् ।

अर्का केन्द्रीय सदस्य राजेन्द्र केसीले पार्टीको प्रदेश समितिलाई थप अधिकार दिनुपर्नेमा जोड दिए । 

यस्तै, देवेन्द्रराज कँडेलले वैदिक सनातन धर्मसापेक्ष देश बनाउन संविधान संशोधनको नेतृत्व पार्टीले लिनुपर्ने धारणा राखे । उनले अबको संविधान संशोधनबाट मुलुकलाई वैदिक सनातन धर्मसापेक्ष देश बनाउनुपर्ने बताए ।

अर्का केन्द्रीय सदस्य राजीव कोइरालाले कांग्रेस–एमाले गठबन्धनको औचित्यलाई सरकारले कामबाट प्रमाणित गर्नुपर्ने बताए ।

यस्तै, गोविन्द भट्टराईले संविधान संशोधनको विषयमा पार्टीका समर्थकलाई सूचित गर्न पार्टीले सक्रिय भूमिका खेल्नुपर्ने बताए ।

यसैगरी, मोहन बस्नेतले भुटानी शरणार्थी प्रकरण र गिरिबन्धु टी स्टेटसम्बन्धी दुई महामन्त्रीका सार्वजनिक वक्तव्यले गठबन्धनलाई अप्ठेरोमा पारेको बताए । महामन्त्रीहरूको यस्तो वक्तव्यले गठबन्धनको औचित्यमा प्रश्न उठ्न सक्ने उनको भनाइ छ ।

"महामन्त्रीहरूले शेरबहादुर देउवा प्रधानमन्त्री नबनून् भन्ने सोच राखेर यस्तो बोल्दै छन् । उहाँरूका यस्ता हर्कतलाई रोक्नुपर्छ," उनले भने ।

बैठकमा सातै प्रदेश सभापतिहरूले आआफ्ना प्रदेशका रिपोर्टिङ गरेका थिए । उनीहरूले प्रदेशको अवस्था, चुनौती र भाबी योजनाबारे विस्तृत जानकारी गराएका थिए ।