काठमाडौं । प्रधान्मन्त्री केपी शर्मा ओलीले सदनको चालु अधिवेशनबाट संक्रमणकालीन न्यायसम्बन्धी विधेयक पारित गरिने बताएका छन् । मंगलबार टीआरसी कार्यदलको प्रतिवेदन बुझ्दै उनले संशाेधनका लागि सदनमा रहेको टीआरसी विधेयकमा दलहरूबीच सहमति जुट्नु कोसेढुंगा भएको उल्लेख गरे । उनले कानुन बनाएरै शान्ति प्रकृयाको बाँकी अन्तिम काम टुंगोमा पुर्याउने बताए । 

“अब यसलाई संसद्को समितिले सर्वसम्मतिले पारित गरेर पठाउँछ र पूर्ण हाउसले पनि सदनमा पास गर्छौं । यसै अधिवेशनबाट पास गर्छौं‚” उनले भने । 

प्रधानमन्त्री ओलीले धेरै छलफल र लामो समयपछि विधि पुर्याएर विधेयकमा सहमति जुटाएको भन्दै राजनीतिक दलहरुबीच अब कुनै पनि विवाद नरहने बताए । 

“कार्यदलले हामीसँग पनि सँगसँगै परामर्श गरेको छ । पार्टीहरूबीच सहमति जुट्दैन भन्ने पनि छैन । पार्टीको सहमति छ, दलका सांसदको पनि यो विधेयकमा सहमति छ‚” उनले भने । 

प्रधानमन्त्री ओलीले थालिएको शान्ति प्रकृया र त्यसको अन्तिम किस्ताको रूपमा सत्य निरूपण र मेलमिलाप कार्य अघि बढाउन संशोधन विधेयक आवश्यक भएकाले सदनमा ल्याइएको बताए । उनले विधेयक पीडितमैत्री हुन नसकेपछि संशोधन विधेयक ल्याउनुपरेको उल्लेख गरे ।
 
“यो विश्व समूदायले पनि नमुनाको रूपमा बुझोस् भनेर संशोधन विधेयक ल्याएका हौँ । सर्वोच्च अदालतको फैसला र पीडितमैत्री कानुन बनाउन भनेर प्रत्याभूति गराउनेजस्ता कुरा ध्यानमा राखेर अन्तिम रुपमा द्वन्द्वको अवशेष समाप्त गर्न र भविष्यमा यस्तो द्वन्द्व नहोस् भनेर यो विधेयक ल्याउनु परेको हो,” उनले भने, “तत्काल संशोधन पारित गरेर कार्यान्वनय लैजान्छौँ ।”