काठमाडौं । सत्तासाझेदार दल नेपाली कांग्रेसी सांसद सपना राजभण्डारीले कक्षा–१२ को परीक्षामा कम विद्यार्थी उत्तीर्ण भएको जिम्मेवारी कसले वहन गर्ने भन्दै प्रश्न गरेकी छन् । 

सोमबार प्रतिनिधिसभा बैठकको शून्य समयमा उनले एसईई र कक्षा–१२ मा आधाभन्दा बढी परीक्षार्थी अनुत्तीर्ण भएको उल्लेख गरिन् । उनले कलिला विद्यार्थीलाई असफलताको ‘ट्याग’ भिराएको जिम्मा कसले लिने भन्दै प्रश्न गरिन् ।

“१२ को परीक्षामा ५२.१५ प्रतिशत विद्यार्थी पास भए । एसईईमा ४७.८७ प्रतिशत मात्र पास भए । दुवैथरी परीक्षामा आधाभन्दा धेरै विद्यार्थी फेल गराइयो,” उनले भनिन्, “कलिला विद्यार्थीलाई असफलताको ट्याग भिराइयो । तिनलाई निराश तुल्याइयो । यसको जिम्मेवारी कसले लिने ?”

सांसद राजभण्डारीले किन यस्तो नतिजा आयो भन्दै थप प्रश्न गरिन्, “यसमा दोषी को ? शिक्षा मन्त्रालय कि विभाग ? शिक्षक कि अभिभावक या विद्यार्थी स्वयम् ?” उनले यसप्रति सरकारको ध्यानाकर्षण गराइन् ।