काठमाडौं । कार्ल्सबर्गले आफ्नो साझेदार सीएसएपीएल (सिंगापुर) होल्डिङ्स प्रालिबाट कार्ल्सबर्ग साउथ एसिया प्रालि (सीएसएपीएल) मा बाँकी रहेको ३३.३३ प्रतिशत सेयर किन्ने सम्झौतामा हस्ताक्षर गरेको छ ।

यो सम्झौतासँगै कार्ल्सबर्ग साउथ एसिया पीटीई  लिमिटेडमार्फत गोरखा ब्रुअरी प्रालिमा हालको ९० प्रतिशत सेयर स्वामित्व र अब थप हुने ९.९४ प्रतिशत खरिद गर्ने भएको छ । कार्ल्सबर्ग साउथ एसिया पीटीई लिमिटेड इन्डिया प्रा.लि.मा १०० प्रतिशत र नेपालमा रहेको गोर्खा ब्रुअरीमा हाल ९० प्रतिशत सेयर लगानी गरेको होल्डिङ कम्पनी हो ।

हाल भएको सेयरमा गोर्खा ब्रुअरीमा ९.९४ प्रतिशत सेयर खरिद गर्ने सम्झौता भएको कम्पनीले जानकारी दिएको छ । प्रस्तावित कारोबारको सम्झौता समाप्तिपश्चात कार्ल्सबर्गले भारतमा रहेको सम्पूर्ण व्यापारको शतप्रतिशत स्वामित्व प्राप्त गर्नेछ ।

“सेयर स्वामित्वमार्फत नेपालमा रहेको गोर्खा ब्रुअरीको ९९.९४ प्रतिशत सेयर स्वामित्व पनि प्राप्त गर्नेछ । प्रस्तावित कारोबारको कुल खरिद मूल्य ७४४ मिलियन अमेरिकी डलर रहेको छ । यो सम्झौतापत्रको अधिनमा रही समायोजन हुन सक्नेछ” विज्ञप्तिमा उल्लेख छ ।

कारोबारको ७४४ मिलियन अमेरिकी डलरमध्ये २०७ मिलियन अमेरिकी डलर रकम हालका लागि कार्ल्सबर्गसँग रहने पनि बताइएको छ । जुन रकम खरिद बिक्री सम्झौता (एसपीए) को अधीनमा रहेर आउन सक्ने दाबीको भुक्तानी गरी बाँकी रहेको रकम आगामी तीनदेखि पाँच वर्षभित्र हस्तान्तरण गरिसक्ने सम्झौता भएको बताइएको छ ।

प्रस्तावित कारोबारहरू सन् २०२४ को अन्तिम त्रैमाससम्ममा सम्पन्न गरिसक्ने अपेक्षा गरिएको छ । प्रस्तावित कारोबार हुनका लागि दुई पक्षबीच केही विशेष सर्तहरू पूरा हुनुपर्ने गरी सम्झौता भएको छ । यो सम्झौतासम्बन्धी सर्तहरू पूरा गर्नुका साथै नेपालमा कारोबार हुँदा पालना गर्नुपर्ने सरकारी स्वीकृतिका आवश्यक विषयहरू पनि यसमा समावेश छन् ।

प्रस्तावित कारोबारहरूलाई भारतको प्रतिस्पर्धा आयोगले अनुमति दिइसकेको हुनाले कुनै पनि अन्य नियामक 'एन्टीट्रस्ट अथोरिटी' को आधार यस कारोबारमा समावेश नहुने बताइएको छ । कार्ल्सबर्ग समूहका प्रमुख कार्यकारी अधिकृत (सीईओ) जाकोब आरुप एन्डरसनले भनेका छन्, "हामी हाम्रा साझेदारसँग मैत्रीपूर्ण सम्झौतामा पुग्न सक्षम भएकोमा र दुईवटा महत्त्वपूर्ण एसियाली व्यवसायहरूमा पूर्ण नियन्त्रण हासिल गर्न सकेकोमा असाध्यै खुस्ी छौँ । भारतमा व्यापार विस्तार गर्नु हाम्रो कम्पनीको ’एसीलेटेड एसएआएल स्टाटेजी’ को प्रमुख प्राथमिकता हो । हामी यस रोमाञ्चक बियर बजारमा दीर्घकालीन वृद्धिका अवसरहरू हासिल गर्न लगानीलाई तीब्र रुपमा बढाउनेछौँ ।"