काठमाडौं । नेपाल प्रहरीले बुधबार (हिजो) दिउँसो साढे ३ बजे सूचना पायो, ‘ढल्कु क्षेत्रमा ‘ग्याङ फाइट’ भयो ।’ लगत्तै प्रहरी वृत्त सोह्रखुट्टेको टोली घटनास्थल पुग्यो ।

काठमाडौं महानगरपालिका–१७, पोडेटोलस्थित दुई नम्बर गल्लीमा उक्त घटना हुँदै थियो । छिमेकी–छिमेकीबीच खुकुरीसहित ‘ग्याङ फाइट’को घटना नियन्त्रण गर्न प्रहरीलाई हम्मेहम्मे पर्‍यो ।

झगडामा उत्रिएका युवादेखि महिलालाई नियन्त्रणमा लिन प्रहरीलाई सकस भएको थियो । त्यसक्रममा खुकुरी प्रहारबाट सोही ठाउँका ३३ वर्षीय अनित पुजारीको घटनास्थलमै मृत्यु भयो । उनको शरीरभरि अन्धाधुन्ध खुकुरी प्रहार गरिएको थियो ।

घटना यतिमै रोकिएन । एकापसमा खुकुरी हानाहानका क्रममा थप तीनजना गम्भीर घाइते भए ।

आरोपितलाई पक्राउ गर्ने कि पीडितलाई अस्पताल पठाउने भन्ने प्रहरीमाथि दबाब थियो । अनितका दाइ र भाउजू समेत गम्भीर घाइते थिए ।

प्रहरीका अनुसार, अनितका दाइ ४९ वर्षीय दिनेश पुजारीको एउटा हातका तीन औँला छिनालिएका छन् । उनकी भाउजू ४२ वर्षीया माया पुजारीमाथि समेत अन्धाधुन्ध खुकुरी प्रहार गरिएको थियो ।

घाइतेमध्ये मायाको अवस्था गम्भीर छ । ललितपुरस्थित मेडिसिटी अस्पतालमा उनको उपचार भइरहेको जिल्ला प्रहरी परिसर काठमाडौंका एसपी नवराज अधिकारीले जानकारी दिए ।

मायाका श्रीमान् अर्थात् अनितका दाइ दिनेशको पनि उपचार जारी छ । ट्रमा सेन्टरमा उनको उपचार भइरहेको छ । ट्रमा सेन्टरमै अर्का एक घाइतेको पनि उपचार भइरहेको एसपी अधिकारीले बताए ।

उनीहरूबाहेक स्थानीय ५२ वर्षीय सुविन्द्र पोडे, ५४ वर्षीय किरण पुजारी, ३९ वर्षीय विक्रम पुजारी र २३ वर्षीय अमृत पुजारी सामान्य घाइते छन् ।

तीन दिनअघि पनि गरिएको थियो खुकुरी प्रहार
प्रहरीका अनुसार, पोडेटोलस्थित इन्द्रेणी मन्दिरको पुनर्निर्माणको काम भइरहेको थियो । मन्दिरको रेखदेखदेखि निर्माणकार्यमा अनित र किरण पुजारी खटिएका थिए ।

मन्दिरको मर्मत तथा रेखदेखमा सोमबार अनितका दाइ विक्रम र किरण खटिएका थिए । त्यही बेला किरणमाथि खुकुरी प्रहार गरियो । उनी सामान्य घाइते भए ।

मन्दिर क्षेत्रतिर डुलिरहने रोशन बस्नेतले किरणमाथि खुकुरी प्रहार गरेका थिए । किरणले अनितका दाइ विक्रमको योजनामा आफूमाथि खुकुरी प्रहार गरिएको आंशका गरे ।

त्यही विषयले उग्ररूप लिँदा बुधबार पुनः खुकुरी हानाहान भएको थियो । रोशनलाई सोमबार नै पक्राउ गरेर प्रहरीले मुद्दा चलाएको छ ।

बुधबारको घटनामा संलग्न १३ जनामाथि प्रहरीले अनुसन्धान थालेको छ । तीमध्ये ११ जनालाई प्रहरी वृत्त सोह्रखुट्टेको टोलीले थुनामा राखेर अनुसन्धान गरिरहेको छ । घटनाका मुख्य आरोपितमध्येका किरण उपचारका क्रममा छन् ।

पक्राउ पर्नेमा १९ वर्षीय सुजल देउला, ३५ वर्षीय अमृत पुजारी, ३४ वर्षीय सागर देउला, ४६ वर्षीय रवीन्द्र पोडे, २९ वर्षीया कलेनी पुजारी, ३५ वर्षीया टीकामाया पुजारी र २२ वर्षीया सञ्जाली पुजारी छन् । प्रहरीले घटनास्थलबाट एउटा खुकुरी पनि बरामद गरेको छ ।