पोखरा । गण्डकीका भौतिक पूर्वाधार विकास तथा यातायात व्यवस्थामन्त्री राजीव गुरुङ (दीपक मनाङे) लाई कारबाही गर्न पोखराका पत्रकारहरूले माग गरेका छन् । सोमबार संसदीय पत्रकार मञ्च गण्डकीको अगुवाइमा पत्रकारहरूले कार्यवाहक मुख्यमन्त्री विन्दुकुमार थापालाई ध्यानाकर्षण गराउँदै मनाङेमाथि कारबाहीको माग गरेका हुन् ।

मन्त्री मनाङेले बेलाबेलामा पत्रकारहरूमाथि अराजक अभिव्यक्ति दिँदै आएका छन् । प्रदेशसभाको बैठकमै मन्त्रीको हैसियतमा जवाफ दिने क्रममा उनले पत्रकारहरूलाई 'घरज्वाइँ'को उपमा दिएका थिए ।

“पत्रकारले सरकार बनाउन सक्छ ? त्यो उहाँहरूले बुझ्नुपर्छ । पत्रकारलाई सम्बोधन गरेन भन्छ । यो भन्दा के गर्ने हो ? हाम्रैबारेमा जे पायो त्यही लेखिरहेको हुन्छ । फेरि हामीले उनीहरूलाई ख्वाइरहेको हुन्छौँ । यत्तिको इज्जत त ज्वाइँलाई पनि गरेको थिएनौँ । घरज्वाइँ भन्दा पनि राम्रो गरेको छौँ । यो भन्दा के गर्ने हो ?,” बजेटमाथिको छलफलमा मनाङेले दिएको अभिव्यक्ति हो, यो ।

सदनमा नै उठेको यो विषयलाई कसैले ध्यान भने दिएनन् । हालैमा उनले पत्रकारको नामै तोकेर कुटिनुपर्ने अभिव्यक्ति दिएका छन् । मनाङेले सम्हालेको मन्त्रालयअन्तर्गत यातायात क्षेत्र पनि पर्दछ । आइतबार गण्डकीका यातायात व्यवसायीहरूले राइड सेयरिङ एपसम्बन्धी कार्यविधि ल्याउन नहुने भन्दै सार्वजनिक सवारी ठप्प पारे । त्यसक्रममा रिपोर्टिङमा गएका दुईजना पत्रकारमाथि कुटपिट पनि भयो । उक्त प्रकरणमा कास्की प्रहरीले पाँच जनालाई पक्राउ गरेको छ भने थप केहीलाई खोज्दै छ ।

तर, मनाङेले ट्याक्सी चालकबाट अमृत सुवेदी कुटिनुपर्ने भन्ने अभिव्यक्ति दिएका थिए । यसको कारण चाहिँ सेतो गन्जीमा भाइरल मनाङेको तस्बिरसँग सम्बन्धित छ । पत्रकार सुवेदीले उक्त तस्बिर सामाजिक सञ्जालमा सेयर गरेसँगै भाइरल भएको थियो । सोही प्रकरणलाई लिएर मनाङेले पत्रकार कुटिनुपर्ने अभिव्यक्ति दिएका हुन् ।

उनी कहिले स्वकीय सचिवलाई कार्यवाहकको जिम्मा दिने त कहिले कर्मचारी कुटपिट गर्नेसहितका कारण विवादित बन्दै आएका छन् । अघिल्लो कार्यकालमा तत्कालीन कास्कीका एन्फा अध्यक्षमाथिको हातपात प्रकरणमा उनी कास्की प्रहरीको हिरासतमा पुगेका थिए । पटकपटक मन्त्री बने पनि उनको कार्यशैली झनै अराजक बन्दै गएको छ ।

पछिल्लो समय त कार्यकक्षमै मदिरा सेवनसमेत गर्ने गरेको मन्त्रालय स्रोत जनाउँछ । तर, डरका कारण उनीविरुद्ध कोही बोल्न नसक्ने अवस्था छ ।

मनाङेको यही गुन्डागर्दी शैली र पत्रकारमाथि गरेको टिप्पणीलाई लिएर सोमबार गण्डकी सरकारको धारणा माग गर्दै उनलाई कारबाहीको माग गरिएको हो ।

गण्डकी प्रदेश सरकारले मन्त्रिपरिषद्का सदस्यले पालना गर्नुपर्ने आचारसंहिताले पनि ‘आफ्नो मन्त्रालयमा जाँदा वा औपचारिक कार्यक्रममा उपस्थित हुँदा भड्किलोरूपले प्रस्तुत हुने वा मद्यपान गर्नु हुँदैन’ भनेको छ ।

कार्यवाहक मुख्यमन्त्री थापालाई पत्र बुझाउँदै संसदीय पत्रकार मञ्च गण्डकीका अध्यक्ष भरत कोइरालाले मनाङेले दिएको अभिव्यक्ति स्वतन्त्र प्रेसमाथिको नाङ्गो हस्तक्षेप रहेको बताए ।

“संघीय शासन व्यवस्थाको सुदृढीकरणका लागि पत्रकारिता क्षेत्रबाट हुँदै आएको अभ्यासलाई गण्डकी प्रदेश सरकारले पटक्कै बिर्सन हुँदैन । अतः माननीय मन्त्रीले पत्रकारको नामै किटेर दिएको अभिव्यक्तिप्रति गण्डकी प्रदेश सरकारको धारणा सार्वजनिक गर्न संसदीय पत्रकार मञ्च ध्यानाकर्षण गराउँछ । साथै नैतिक आचारणको ख्याल नगर्ने र पत्रकारमाथि गैरजिम्मेवार अभिव्यक्ति दिने मन्त्री राजीव गुरुङलाई कारबाही गर्न गण्डकी प्रदेश सरकारसमक्ष माग गर्दछौँ,” ध्यानाकर्षण पत्रमा भनिएको छ ।