पोखरा । विद्यार्थी बोकेको बस दुर्घटना हुँदा पोखरामा एक जनाको निधन भएको छ । 

सोमबार बिहान पोखरा २१ बाट विद्यार्थी बोकेर पोखरा १७ मा रहेको एलपी देवकोटा विद्यालयतर्फ आउँदै गरेको बस दुर्घटनामा परेको थियो । 

पोखरामा २२ विद्यार्थी सवार स्कुल बस दुर्घटना

पोखरा २१ स्थित मट्टिखान जाने सडकको थुन्कु भन्ने ठाउँमा दुर्घटनामा हुँदा चालक, सहचालकसहित ३० जना घाइते भएका थिए । यद्यपी कास्की प्रहरीले यसअघि बसमा सवार २२ विद्यार्थीसहित २४ जना भएको बताएको थियो ।

उक्त दुर्घटनामा परि विद्यालयकै एक स्टाफको मृत्यु भएको छ । कास्की प्रहरीका सूचना अधिकारी डीएसपी वसन्तकुमार शर्माका अनुसार ३३ वर्षीय आरती विकको ज्यान गएको हो । निधन भएकी विक पोखरा २१ कै हुन् ।

अन्य घाइतेको पोखराका तीन अस्पतालमा उपचार भइरहेको छ । डीएसपी शर्माका अनुसार पोखराको गण्डकी मेडिकल कलेज, पश्चिमाञ्चल क्षेत्रीय अस्पताल र मणिपाल शिक्षण अस्पतालमा उपचार भइरहेको छ । 

विभिन्न अस्पतालमा उपचार भइरहेका कारण बसमा सवार कतिजना थिए भन्ने यकिन भइनसकेको पनि उनले जानकारी दिए ।