काठमाडौं । गत आर्थिक वर्ष २०८०/८१ मा स्मार्टफोन, हेडफोन र मोबाइल चार्जरको आयातमा मात्र मुलुकबाट करिब साढे ३१ अर्ब रुपैयाँ बाहिरिएको छ । भन्सार विभागले सार्वजनिक गरेको गत आवको वैदेशिक व्यापारसम्बन्धी तथ्यांकानुसार नेपालले बढी आयात गर्ने वस्तुमा पेट्रोलियम पदार्थ र फलामजन्यपछि तेस्रो स्थानमा स्मार्टफोन छ ।

गत आवमा स्मार्टफोन आयातमा मात्र २८ अर्ब ६६ करोड ६२ लाख ३५ हजार रुपैयाँबराबर बाहिरिएको हो । उक्त अवधिमा १८ लाख ३९ हजार ३५ सेट स्मार्टफोन नेपाल भित्र्याइएको छ । स्मार्टफोनको आयातबापत सरकारले पाँच अर्ब ३३ करोड ९४ लाख रुपैयाँबराबर भन्सार राजस्व संकलन गरेको पनि विभागको तथ्यांकबाट देखिन्छ ।

गत आवमा एक अर्ब ४२ करोड ९० लाख ८५ हजार रुपैयाँबराबरका १७ लाख ५८ हजार ६९० सेट टेलिफोन आयात गरिएको छ ।

यस्तै, हेडफोन आयातमा मात्र ६५ करोड ९३ लाख २८ हजार रुपैयाँ विदेशिएको छ । एक वर्षमा २९ लाख ९६ हजार २२९ हेडफोन आयात गर्दा सरकारले २१ करोड नौ लाख २३ हजार रुपैयाँ भन्सार राजस्व संकलन गरेको छ । 

गत आवमा ५० करोड ७१ लाख ६३ हजार रुपैयाँबराबरका ४३ लाख ८२ हजार ८३९ वटा मोबाइल चार्जर आयात गरिएको छ । चार्जर आयातबाट मात्र १५ करोड ५७ लाख १० हजार रुपैयाँ राजस्व संकलन भएको छ ।

गत आवमा ३५ करोड ५१ लाख ४८ हजार रुपैयाँबराबरका दुई लाख ३९ हजार ६६९ स्मार्टवाच आयात गरिएको छ । रासस