![केदार कार्कीमाथि लाग्यो सचिवलाई कुट्ने धम्की दिएको आरोप, सचिवालयले गर्यो अस्वीकार](https://12khari.top/uploads/posts/Kedar-Karki-1697732413.jpg)
विराटनगर । कोसी प्रदेशका पूर्वमुख्यमन्त्री केदार कार्कीमाथि सचिवलाई कुटपिट गर्ने धम्की दिएको आरोप लागेको छ । कोसीको सामाजिक विकास मन्त्रालयका सचिव लक्ष्मीप्रसाद भट्टराईले आफूलाई कार्कीले ‘कुटपिट गर्ने धम्की दिएको’ आरोप लगाएका हुन् ।
कार्कीले टेलिफोनमार्फत 'शौचालयमा थुन्ने' धम्की दिएको भन्दै भट्टराईले प्रशासनमा उजुरी नै दिएका छन् ।
जिल्ला प्रशासन कार्यालय मोरङमा मंगलबार उजुरी परेपछि कार्कीको सचिवालयले आरोपका सम्बन्धमा विज्ञप्तिमार्फत प्रस्टीकरण दिएको छ ।
कार्कीको सचिवालयले तालुकदार मन्त्रालयबाट हुने काममा सचिव भट्टराईले ‘कमिसन माग्ने गरेको र पूर्वमुख्यमन्त्रीको समेत बदनाम गर्ने गरेको’ दाबी गरेको छ । प्रदेशमा गलत काम नगर्न भन्दै सचिवलाई ‘सचेतमात्र गराएको’ कार्कीका स्वकीय सचिव दिवश राजवंशीले जनाएका छन् ।
सचिव भट्टराईले ‘कार्कीविरुद्ध अनर्गल प्रचार गरेको र त्यही विषयमा सचेत गराएको’ दाबी विज्ञप्तिमा गरिएको छ ।
कार्की मुख्यमन्त्री रहँदा प्रदेश राजधानी विराटनगरमा सम्पन्न भएको “विराट गोल्डकप र कोशी प्रदेशस्तरीय क्रिकेट प्रतियोगिता जस्ता लगायतका खेलकुद गतिविधिको भुक्तानीका लागि बजेट रकमान्तर गराई मन्त्रिपरिषद्को निर्णय गरी भुक्तानी दिने तयारी सचिवज्यूले स्वयं गर्नुभएको अवगत गराउन चाहन्छु,” विज्ञप्तिमा उल्लेख छ ।
सचिव भट्टराईले रकम भुक्तानीको मन्त्रिपरिषद् निर्णयका लागि टिप्पणी उठाएर अर्थ मन्त्रालयको सहमतिसमेत लिएको र त्यसपछि खेलकुद क्षेत्रका लागि रकमान्तर भएर आएको एक करोड ६६ लाख रकमबाट मुख्यमन्त्रीको नाममा समेत सेवाग्राहीबाट कमिसन मागेका विज्ञप्तिमा जनाइएको छ ।
“कमिसन रकम हात नपरेपछि सचिव भट्टराईले मन्त्रिपरिषद् प्रस्ताव लग्न छाडेर काठमाडौं जानुभएको र लामो समय विदामा बसेको अहिले खेलकुद गतिविधिमा संलग्नहरूले गुनासो गरिरहनुभएको अवगत गराउन चाहन्छु,” विज्ञप्तिमा भनिएको छ ।