काठमाडौं । अमेरिकाको बहुराष्ट्रिय अटोमोटिभ एवम् शुद्ध ऊर्जा कम्पनी टेस्लाले उत्पादन गरेको साइबरट्रकले विश्वभर चर्चा पाएको छ ।

विश्वको सबैभन्दा ठूलो विद्युतीय सवारी (ईभी) उत्पादक कम्पनी टेस्लाले साइबरट्रकलाई विशेष गाडीको रुपमा निमार्ण गरेको छ । साइबरट्रकको डिजाइन, क्षमता, गति, अटोपाइलट मोड लगायतका शक्तिशाली र अत्याधुनिक फिचरले यसलाई विशेष गाडी बनाएको छ ।

टेस्लाले वास्तविक तथ्यांक सार्वजनिक नगरे पनि विश्वभर दश हजारभन्दा बढी साइबरट्रक कम्पनीले बिक्री गरिसकेको छ । 

कस्तो छ साइबरट्रक

साइबरट्रकको टोइङ (तान्न सक्ने) क्षमता ४ हजार ९८९ किलो छ । गाडीले एक हजार १३३ किलोग्राम तौल बोक्न सक्छ । यसको रेन्ज झन्डै साढे पाँचसय किलोमिटर छ । गाडीले दुई सेकेन्डमै ९६ किलोमिटर प्रतिघण्टाको गति दिन सक्छ ।

यो गाडी हिमाल, पहाड, तराइको बाटो, पानी जम्ने बाटो र पक्की वा कच्ची बाटोका लागि बनेको कम्पनीको भनाइ छ । गाडीको बाहिरी सतहको अल्ट्रा–हार्ड स्टेनल्यास स्टिलले कुनै क्षति हुन नदिने कम्पनीको दाबी छ । 

साइबरट्रकको बडीमा हथौडाले हानेको, बन्चरोले हानेको एवम् गोली हान्दासमेत न्युन क्षति वा क्षति नै नभएको भिडियोहरुले चर्चा पाएको थियो । गाडीको सिसाले ११२ किलोमिटर प्रतिघण्टाको गतिको बेसबलको असरलाई समेत थेग्न सक्ने टेस्लाको दाबी छ । 

यसले गाडीभित्रसमेत बाहिरको हल्ला जान नदिएर शान्त बनाइराख्न मद्दत गर्छ । गाडीको पछाडि ६ फिट लामो र ४ फिट चौडा सामान बोक्न मिल्ने ठाउँ छ । गाडीको अगाडि र हिँड्न गियर लकरमा पनि ठाउँ छ ।

गाडीलाई १५ मिनेट चार्ज गर्दा २१८ किलोमिटरको रेन्ज प्राप्त गर्न सकिने कम्पनीले जनाएको छ । बिजुली नहुँदा विद्युतीय उपकरण चलाउन सकिने र ११.५ किलोवाट बिजुली गाडीबाट घरमा प्रयोग गर्न सकिने टेस्लाको दाबी छ ।

गाडीमा अत्याधुनिक क्याबिन, प्राविधिक फिचर र मनोरञ्जन उपलब्ध छ । गाडीको अगाडि १८.५ इञ्जको र पछाडि ९.४ इञ्जको टच स्क्रिन छ । गाडीले ४८० मिटर परसम्म उज्यालो दिन्छ ।

कति छ गाडीको मूल्य ?

टेस्लाले हाल साइबरट्रकका तीन भेरियन्टका लागि बिक्री खुला गरेको छ ।

रेयर–ह्विल ड्राइभ 

जसमा सुरुवाती भेरियन्ट रेयर–ह्विल ड्राइभको मूल्य ६० हजार ९९० अमेरिकी डलर (८१ लख ५६ हजार रुपैयाँ ) छ ।  यसले ४०२ किलोमिटर रेन्ज दिन्छ भने ६.५ सेकेन्डमा ९६ किलोमिटर प्रतिघण्टाको गति दिन्छ ।

अल–ह्विल ड्राइभ

दोस्रोमा अल–ह्विल ड्राइभ साइबरट्रक रहेको छ । ५४७ किलोमिटर रेन्ज दिने यो गाडीले ४.१ सकेन्डमा ९६ किलोमिटर प्रतिघण्टाको गति दिन्छ । 

१८० किलोमिटर प्रतिण्टाको अधिकतम गति रहेको गाडीको डुअल मोटरले ६०० हर्सपावर (करिब ४४७ किलोवाट) क्षमता उत्पादन गर्छ । यसको टर्क ७ हजार ४३५ पाउन्डफुट छ । यसको मूल्य ७९ हजार ९९९ अमेरिकी डलर अर्थात् एक करोड ६ लाख रुपैयाँ छ ।

साइबरबेस्ट

टेस्लाको सबैभन्दा माथिल्लो रेन्जको साइबरट्रक साइबरबेस्ट रहेको छ ।  यसले दिने रेन्ज ४०२ किलोमिटर नै छ तर, २.१ सेकेन्डमै ९६ किलोमिटर प्रतिघण्टाभन्दा बढी गति दिनसक्छ । यसको अधिकतम गति २०९ किलोमिटर प्रतिघण्टा छ । मोटर क्षमता ८४५ हर्सपावर रहेको साइबरबेस्टको टर्क दश हजार २९६ पाउन्डफुट छ ।

नेपाल भित्रिएला ?

भौगोलिकरुपमा नेपालका बाटोहरुका लागि पनि उत्कृष्ट देखिने साइबरट्रक नेपाल भने भित्रिइसकेको छैन । टेस्लाका अन्य मोडलहरु नेपालमा भित्रिएका छन् । तर, साइबरट्रक भने हालसम्म नेपाल भित्रिएको छैन । साइबरट्रक नै नभित्रिए पनि नेपाली बजारमा करोडभन्दा माथिका गाडीहरुको बिक्री उल्लेख्यरुपमा हुने गरेको छ ।