नयाँदिल्ली । भारतका प्रधानमन्त्री नरेन्द्र मोदीले गएको संसद्को सत्रमा विपक्षीले आफ्नो आवाज दबाउने प्रयास गरेको भन्दै गुनासो गरेका छन् । भारतमा बजेट सत्र सुरु हुनुभन्दाअघि सोमबार पत्रकारहरूसँग कुरा गर्दै उनले सो कुरा बताएका हुन् ।

उनले ६० वर्षपछि कुनै पनि सरकार लगातार तेस्रोपटक सत्तामा आएको र तेस्रो कार्यकालमा पहिलो बजेट आउन लागेको बताए ।

उनले सांसदहरूलाई अब पाँच वर्ष देशको लागि लड्नुपर्ने बताएका थिए । उनले भने, “म बहुत दुःखका साथ भन्न चाहन्छु कि केही सांसदले आफ्नो क्षेत्रको कुरा राख्ने मौका दिएनन् । आफ्नो राजनीतिक विफलतालाई ढाक्नका लागि उनीहरूले संसद्को महत्त्वपूर्ण समयको गलत रूपमा प्रयोग गरे ।”

उनले चुनिएको सरकारको आवाज कुल्चने प्रयास अलोकतान्त्रिक भएको बताउँदै २ घण्टा ५० मिनेटसम्म देशको प्रधानमन्त्रीको गला घोट्ने र आवाज दबाउने प्रयास गरिएको बताए । लोकतान्त्रिक व्यवस्थामा यस्तो कामलाई कुनै स्थान नहुने उनको भनाइ थियो ।  

अघिल्लो संसद्‌मा प्रधानमन्त्री बोल्दा विपक्षी कांग्रेसका सांसदहरूले नाराबाजी गरेको विषयलाई लिएर मोदीले गुनासो गरेका हुन् । बीबीसी