![जमिनको विवाद मिलाइदिन आग्रह गर्दै घरैमा पुगेका समूहले रायको हत्या गरेको आशंका](https://12khari.top/uploads/posts/death1-1695793149.jpg)
काठमाडौं । जग्गाको विवाद मिलाइदिन आग्रह गर्दै घरैमा पुगेका समूहले नै सर्लाहीका रामचन्द्र रायको हत्या गरेको हुनसक्ने आशंका प्रहरीले गरेको छ । उनी पूर्वभूमिसुधार राज्यमन्त्रीसमेत हुन् ।
८० वर्षीय रायको उनकै निवास सर्लाहीको चन्द्रनगर गाउँपालिका–१ मा गएराति हत्या गरिएको हो । सर्लाही प्रहरीले घटनाको थप अनुसन्धान अघि बढाएको छ । प्रहरीका अनुसार रायको धारिलो हतियार प्रयोग गरेर हत्या गरिएको खुलेको छ ।
उनको टाउकोको बायाँपट्टी भागमा धारिलो हतियार प्रहार गरिएको पाइएको छ । धनुषाको लालगढबाट कुकुरसहितको टोली लिएर प्रहरी घटनास्थल पुगेको छ ।
मधेस प्रदेश प्रहरी कार्यालयका प्रमुख प्रहरी नायब महानिरीक्षक (डीआईजी) यज्ञविनोद पोखरेलको टोली पनि घटनास्थलमा पुगेको छ ।
प्रहरीले रायको घरमा काम गर्ने युवासँग सोधपुछ अघि बढाएको छ । उनले प्रहरीलाई दिएको प्रारम्भिक सोधपुछका क्रममा आइतबार साँझ नै तीनजना युवा रायको घरमा आएका थिए । आफूहरूको जमिनको विवाद मिलाइदिन आग्रह गर्दै रायको घरमा पुगेका थिए । उनीहरूले नै राति हत्या गरेको आंशका गरेको बताएका छन् ।
यद्यपि, उनले बताएको कुराको थप पुष्टि प्रहरीले गरिरहेको छ भने सोधपुछको काम भइरहेको जनाइएको छ ।