काठमाडौं । नेकपा (एमाले)का उपमहासचिव प्रदीप ज्ञवालीले नेपाली कांग्रेस र आफ्नो पार्टीबीचको नयाँ सत्तासमीकरण प्रधानमन्त्री बन्न वा सरकार फेर्नका निम्ति मात्र नभएको बताएका छन् ।

शनिबार भक्तपुरमा सञ्चार–संवाद कार्यक्रममा उनले कांग्रेस र एमालेको नयाँ सत्तासमीकरण मुलुकको समग्र विकास र जनतामा विद्यमान निराशा चिर्नका निम्ति भएको जिकिर गरे ।

वर्तमान सरकारको वैधानिकता नेपालको संविधानको धारा ७२ को उपधारा २ नै भएको र उपधारा २ मा उल्लिखित प्रावधान कुनै व्यक्तिविशेषलाई मात्र आकर्षित हुन्छ भनेर तर्क गर्नु गैरसंवैधानिक भएको उनले टिप्पणी गरे ।

उनले नेकपा (माओवादी केन्द्र)लगायत अरू विपक्षी दलले संविधानको धारा ७२ को उपधारा २ को गलत व्याख्या गरेर विषयान्तर गर्ने चालबाजी गरिरहेको बताए ।

उपमहासचिव ज्ञवालीले ‘दुईपटकसम्म संशोधित संविधानमा अब फेरि आवश्यक संशोधन भएको खण्डमा माओवादीले भनेजस्तो गरी कसरी पश्चगमन हुनसक्छ ?’ भन्ने प्रश्न गरे ।

उनले सहकारीका विषयमा संसदीय विशेष छानबिन समितिले प्रतिवेदन दिएपश्चात् समस्या समाधान गर्न सरकार पछि नपर्ने प्रतिबद्धता पनि व्यक्त गरे । हिमालयन टेली भ्वाइस