काठमाडौं । बंगलादेशमा प्रदर्शन र झडपका घटना बढेपछि कर्फ्यु घोषणा गरिएको छ । प्रधानमन्त्री कार्यालयले देशभर कर्फ्यु जारी गरेको छ ।

राजधानी ढाकालगायत धेरै सहरमा केही दिनदेखि जारी हिंसालाई ध्यानमा राख्दै ठूलो मात्रामा सुरक्षा बल तैनाथ गरिएको बीबीसीले जनाएको छ ।

प्रहरी र आन्दोलनकारीबीच धेरै ठाउँमा झडप भएको छ ।  शुक्रबार नरसिङदीको कारागारमा आक्रमण भएको थियो । उक्त कारागारबाट सयौं कैदी भागेका छन् । 

झडपमा कम्तीमा ३५ जनाको मृत्यु भइसकेको छ । 

सरकारका प्रेस सेक्रेटरी नइमुल इस्लाम खानले शान्तिसुरक्षा कायम गर्न सेना परिचालन गरिने बताएका छन् । 

बंगलादेशमा आरक्षण विरोधी विद्यार्थी आन्दोलन चर्किएको हो ।

यसैबीच, बंगलादेशमा नेपाली विद्यार्थी सुरक्षित रहेको परराष्ट्र मन्त्रालयले जनाएको छ । परराष्ट्र मन्त्रालयले बंगलादेशमा विकसित पछिल्लो घटनाक्रम र त्यहाँ रहेका नेपालीको सुरक्षामा नेपाल सरकार सचेत रहेको जनाएको छ ।

परराष्ट्रले शुक्रबार विज्ञप्ति जारी गर्दै सम्बन्धित विश्वविद्यालय, कलेज तथा ढाकास्थित नेपाली दूतावास समेतको सहयोग र समन्वयमा नेपाली विद्यार्थी सुरक्षित रहेको जनाएको छ ।

बंगलादेशमा रहेका नेपालीको थप सहजताका लागि निरन्तर प्रयत्न भइरहेको पनि परराष्ट्रले बताएको छ ।

उता, बंगलादेशमा आरक्षण विरोधी आन्दोलनका क्रममा भएको हिंसा र अशान्तिलाई ध्यानमा राख्दै भारतको विदेश मन्त्रालयले त्यहाँ बस्ने भारतीय विद्यार्थीका लागि ‘एडभाइजरी’ जारी गरेको छ । 

एडभाइजरीमा विद्यार्थीलाई बंगलादेश यात्रा नगर्न भनिएको छ । उनीहरूलाई घरबाट बाहिर ननिस्कन आग्रह गरिएको छ ।

भारतीय विदेश मन्त्रालयले आफ्नो देशका विद्यार्थीलाई सहयोग गर्न २४ सै घण्टा आपतकालीन नम्बर पनि जारी गरेको जानकारी दिएको छ ।