![१९ हजार विद्यार्थीको एसईईको नतिजा पुनर्योग गरिँदै](https://12khari.top/uploads/posts/see1680222263.jpg)
काठमाडौं । राष्ट्रिय परीक्षा बोर्डले १९ हजार ६०० विद्यार्थीको माध्यमिक शिक्षा परीक्षा (एसईई)को नतिजाको अंक पुर्नयोग गर्दै छ । यो संख्या गएको वर्षको भन्दा झन्डै पाँच गुणा बढी हो । पुनर्योग (रि टोटलिङ)का निम्ति गएको वर्ष चार हजार ५०० आवेदन परेको परीक्षा नियन्त्रण कार्यालयको तथ्यांक छ ।
आवेदन परेकामध्ये कार्यालयले साउन १ गतेसम्म चार हजार २९७ जनाको नतिजा सार्वजनिक गरेको छ । जसमा २८२ विद्यार्थीको नतिजा परिवर्तन भएको छ ।
नतिजा परिवर्तन भएकामध्ये ५९ जनाले ४ जीपीए ल्याएका छन् । तीमध्ये पनि दुईजना नन ग्रेडेड भएका विद्यार्थीको नतिजा परिवर्तन भएर ४ जीपीए आएको छ । यीबाहेक अन्य नन ग्रेडेड भएका विद्यार्थीको नतिजा परिवर्तन हुँदा १.६ देखि ३.६ जीपीएसम्म आएको छ ।
यो वर्ष अनलाइनमार्फत् नै आवेदन दिन मिल्ने व्यवस्था गरिँदा पुनर्योग गर्न धेरै आवेदन परेको परीक्षा नियन्त्रक कृष्णप्रसाद शर्मा बताउँछन् । आवेदन दिएका सबै विद्यार्थीको पुनर्योगको नतिजा साउन २३ भन्दा अगाडि निकालिसक्ने शर्माले जानकारी दिए ।
यता प्रतिनिधिसभाअन्तर्गतको शिक्षा स्वास्थ्य तथा सूचना प्रविधि समितिले भने एसईईको नतिजामा ठूलो संख्यामा विद्यार्थी नन ग्रेडेड हुनु राज्यको लज्जाको विषय भएको भन्दै उत्तरपुस्तिका परीक्षण र नतिजा प्रकाशन प्रक्रियामाथि प्रश्न उठाएको छ । पुनर्योगमा धेरै विद्यार्थीको नतिजा परिवर्तन भएको पनि समितिको बुझाइ छ ।
बिहीबारको समिति बैठकबाट एसईईको उत्तरपुस्तिका जाँच र समग्र प्रक्रियाबारे राष्ट्रिय परीक्षा बोर्डलाई स्पष्टीकरण माग्ने निर्णय भएको छ । साथै, पुनर्योगको नतिजामा आएको परिवर्तनबारे पनि के कसो भएको हो भनि बोर्डलाई आवश्यक तथ्यांक बुझाउन निर्देशनदिने निर्णय भएको समिति सभापति अम्मरबहादुर थापाले बताए ।
“५० प्रतिशतभन्दा बढी विद्यार्थी फेल हुनु त राज्य नै फेल भएकोजस्तो भयो, कति विद्यार्थीले नतिजाकै कारण आत्महत्या गरेका छन्, नतिजामा नै फरक परेको भए त्यसको जिम्मा त सरकारले लिनुपर्यो नि,” थापाले बाह्रखरीसित भने ।त्यसैका निम्ति बोर्डलाई नतिजा प्रक्रियाबारे सोधपुछ गर्ने निर्णय भएको उनले बताए ।
यता बोर्डले भने पुनर्योगका निम्ति आवेदन दिएकामध्ये दुईचार प्रतिशत विद्यार्थीको नतिजा फरक पर्नु स्वभाविक भएको दाबी गरेको छ ।
परीक्षा नियन्त्रक शर्मा यो वर्ष पुनर्योगका निम्ति आवेदन नै धेरै परेकाले नतिजा परिवर्तन हुने संख्या केही बढेको देखिएको बताउँछन् ।
“परीक्षकले अंक जोड्न बिर्सिने उल्टो अंक राख्ने जस्ता केही मानवीय त्रुटि भएका छन्, केही विद्यार्थीलाई अन्याय भएको हो, तर समग्र परीक्षा र नतिजा प्रणालीमै समस्या छ भन्ने होइन, हामीले विभिन्न चरणका क्रस चेकपछि मात्रै नतिजा सार्वजनिक गर्छौँ हेलचेक्रयाइँ भएको छैन”, शर्माले बाह्रखरीसित भने ।
एकदेखि सबै विषयमा नन ग्रेडेड भएका विद्यार्थीका निम्ति साउन २३ देखि ३१ गतेसम्म पूरक परीक्षा गरिँदैछ ।
केही विद्यार्थीलाई मानवीय त्रुटिका कारण वर्ष २०८० को एसईईमा सहभागी चार लाख ६४ हजार ७८५ विद्यार्थीमध्ये दुई लाख ४२ हजार ३१३ जना नन ग्रेडेड भएका थिए । तीमध्ये एक विषयमामात्रै अनुत्तीर्ण हुनेको संख्या ६७ हजार ७९६ छ । ४८ हजार ३८ विद्यार्थी दुई विषयमा र एक लाख २६ हजार २९७ विद्यार्थी दुईभन्दा बढी विषयमा नन ग्रेडेड भएका छन् ।