काठमाडौं । राष्ट्रिय स्वतन्त्र पार्टी (रास्वपा)का तत्कालीन महामन्त्री मुकुल ढकालले उपसभामुख इन्दिरा राना मगरसम्बन्धी विवादबारे वैशाखतिरै पार्टी नेतृत्व जानकार रहेको बताएका छन् ।

अमेरिकी दूतावासलाई भिसाको लागि उपसभामुखले लेखेको पत्र सार्वजनिक भएपछि चौतर्फी आलोचना

शुक्रबार बाह्रखरीसँगको टेलिफोन संवादमा उनले अमेरिका लैजाने आश्वासन दिएर पैसा उठाएको र जान नपाएपछि एकजना पीडितले पार्टीमा उजुरी दिएपछि आफूले नेतृत्वलाई जानकारी दिएको बताए ।

ढकालले आफूले पार्टी सभापति रवि लामिछाने‚ उपसभापति स्वर्णिम वाग्ले‚ सहकोषाध्यक्ष दिपक बोहरासहित शीर्ष नेतृत्वलाई जानकारी गराएको बताए ।

उपसभामुखको पत्र, रास्वपाभित्रै सामसुम ! भन्छिन्– गरिबले कहिल्यै सिफारिस नपाउने ?

“यतिसम्म कि इन्दिरा आमालाई मैले बोलाएर ती पाँचजना को हो ? यहाँ ल्याउनुहोस् भनेर भनेको थिएँ‚” ढकालले भने ।

पीडितले पार्टीमा उजुरी दिएपछि आफूले पैसा फिर्ता पाएको र थप झमेलामा पर्न नचाहेकाले बयान दिन आउदिनँ भनेपछि विषय अघि नबढेको ढकालको दाबी छ । आफूले यसबारे गृह मन्त्रालयलाई पनि बुझ्न लगाएको उनको भनाइ छ ।

अमेरिकी दूतावास, परराष्ट्र र संसद् सचिवालयमा घुमेको उपसभामुखको त्यो पत्र 

उनले भने‚ “पाएपछि मैले गृह मन्त्रालयमा दिपक बोहराबाट गृहमन्त्री तथा पार्टी सभापति रवि लामिछानेसम्म कुरा पुराए र बुझ्न लगाए । ती नाम उल्लेख गरिएका कोही पनि मान्छे अमेरिका उडेका छैनन् भन्ने सूचना मलाई गृहबाट आयो ।”

ढकालको भनाइ :

मलाइ दुई–तीन महिनाअघि शंकर श्रेष्ठबाट सूचना आयो, शंकरलाई पार्टीको एकजनाले भनेको रहेछ । पैसा लिएको थियो रे, अनि पैसा फिर्ता गरेन रे । पैसा फिर्ता गरिपाऊँ भन्ने बेहोराको चिठ मलाई आयो । त्यो चिठी पाएपछि मैले गृह मन्त्रालयमा दिपक बोहराबाट गृहमन्त्री तथा पार्टी सभापति रवि लामिछानेसम्म कुरा पुर्‍याएँ र बुझ्न लगाएँ । ती नाम उल्लेख गरिएका कोही पनि मान्छे अमेरिका उडेका छैनन् भन्ने सूचना मलाई गृहबाट आयो ।

त्यसपछि मैले उपसभामुखलाई फोन गरेँ । उहाँले मैले चिनेको होइन, मलाई यसरी आयो । अनि अन्तर्वार्ता सहज बनाइदिन पत्र लेखेँ  भन्नुभयो ।

अनि मैले त्यसरी अधिकार दुरुपयोग हुने गरी पत्र लेख्न पाइन्छ ? भनेपछि उपसभामुखले मलाई थाहा भएन भनेर जवाफ दिनुभयो । अहिले मिडियामा आएका कुरा मलाई त्यसबखत उहाँले भन्नुभएको हो ।

शंकरजीको माध्यमबाट मलाई पीडितहरूको सूचना आयो कि पीडितले पैसा फिर्ता पायो भनेर । मैले उनीहरूलाई बयानका लागि बोलाउने तयारी गरेको थिएँ । पैसा फिर्ता पाएपछि एक जना पीडितले यो इस्यू ठुलो भएकाले म लफडामा पर्न चाहन्नँ‚ पैसा फिर्ता पाएँ अब म केही बयान दिन्न भनेर पीडितले भने । अनि पीडितले बयान दिन्न भनेपछि थप अघि बढ्न सकिएन ।

पाँचजना मान्छे जसको नाम उल्लेख छ । ती एनजीओका मान्छे हुन् कि हैनन् त यो पत्ता लगाउनुपर्छ भनेर मैले इन्दिरा आमालाई पाँचजना मानिसलाई मसँग उपस्थित गराउनू भनेर भनेँ । उहाँले मैले सबै चिनेको छैन, उपेन्द्रलाई मात्र चिनेको हो भनेर भन्नुभयो । उपेन्द्रको नम्बर दिएर कुरा गर्नु भनेर आमाले भन्नुभयो । मैले पनि म उपेन्द्रसँग कुरा गर्दिनँ, तपाई मलाई पाँचजना मान्छे उपस्थित गराउनुहोस् महामन्त्री पदमा रहेर म कसैलाई फोन गर्दिनँ तपाईँ मलाई मान्छे ल्याएर भेटाउनुहोस् भनेर मैले भनेँ । देशमा तपाईं ठूलो पदमा भए पनि पार्टीमा म महामन्त्री हो । मलाई तपाईंले रिपोर्टिङ गर्ने हो । मैले कसैलाई फोन गर्ने हैन भनेर हप्कीको शैलीमा अलि ठूलो स्वरमा मैले त्यस बखत भनेकै हो ।

उहाँलाई मैले ती पाँचजना मान्छे भेटाउनुपर्छ को कहाँ छन् खोजेर मेरो अगाडि उपस्थित गराउनुपर्छ भनेर ‘टास्क’ दिएँ । उहाँले म मान्छे खोज्छु भन्नुभएको थियो । त्यसपछि पार्टी चुनावकेन्द्रित भयो‚ समीक्षा यात्रा भयो‚ त्यसपछि अहिले अवस्था आयो । कुरा यत्ति हो ।

मेरो तर्फबाट महामन्त्रीको रूपमा मैले गर्नुपर्ने काम गरेकै हो । गृह मन्त्रालय र सभापतिकहाँ विषय पुगेकै हो । फलोअप बीचमा किन भएन भन्ने प्रश्न पनि आउँछ । कारण पार्टी राजनीति नै फरक मोडमा आइपुगेको छ ।

यो वैशाखतिरको कुरा हो । त्यसपछि हामी चुनावको तनाव‚ समीक्षा यात्रा भनेर निस्कनुपर्‍यो । त्यसबखत उपसभापति डीपी अर्याललाई खबर भइसकेको रहेछ । मैले पार्टी सभापति रवि लामिछाने‚ उपसभापति स्वर्णिम वाग्ले र सहकोषाध्यक्ष दिपक बोहरालाई खबर गरेँ । यो कुरा त्यसबखत मुख्य नेतृत्व सबैलाई थाहा थियो ।

उपसभामुखज्यूले मलाई थाहा नभएर साइन गरेँ भन्नुभयो । यो आफैँमा गम्भीर भुल हो । थाहा छैन भन्न पाइनँ भनेर छुट हुँदैन । मलाई ती मानिसहरूसँग भेटाइदिनुहोस् भनेर आमासँग भनेको थिएँ । त्यसपछि पार्टी राजनीति के के भयो थाहा नै छ, सबैलाई ।