काठमाडौं । रेस्टुरेन्ट व्यवसायी मनोज बानियाँमाथि खुँडा प्रहार गर्ने समूहका अर्का आरोपित विभाग गुरुङ पक्राउ परेका छन् । धरानका गुरुङलाई उपत्यका अपराध अनुसन्धान कार्यालय ललितपुरको टोलीले मंगलबार चाबहिलबाट नियन्त्रणमा लिएको हो ।

प्रहरीले यसअघि बानियाँमाथि खुँडा प्रहार गर्ने मुख्य आरोपित धनकुटाका दीपक बान्तवा राईलाई पक्राउ गरेको थियो । त्यसको दुई दिनपछि गुरुङलाई समातिएको हो ।

गुरुङसहित खुँडा प्रहार गर्ने घटनामा संलग्न ६ जना पक्राउ परेका हुन् । चुनिखेलामा बानियाँको निर्माणाधीन रिसोर्टमा असार ७ गते ज्यान मार्ने उद्देश्यले उनीमाथि खुँडा प्रहार गरिएको थियो ।

खुँडा प्रहारबाट बानियाँ घाइते भएका थिए । नख्खुस्थित मेडिसिटी अस्पतालमा उपचारपछि उनी ‘डिस्चार्ज’ भएका छन् । उनको बायाँ हात र खुट्टा तथा तीघ्रामा गहिरो चोट लागेको थियो ।

भैँसेपाटीस्थित गोकुल आवासका राजेश केसीको योजनामा उनीमाथि खुँडा प्रहार गरिएको प्रहरीको अनुसन्धानका क्रममा खुलेको छ । केसीसहित उनका सहयोगी सुरेन्द्र महर्जन, आयुमान अधिकारी र आलिंकन लामिछानेलाई प्रहरीले यसअघि नै पक्राउ गरेको थियो । घटनामा संलग्न स्नोप भण्डारीसहित तीनजना अझै फरार छन् ।

केसी र बानियाँले जग्गासम्बन्धी कारोबार गर्दै आएका थिए । उनीहरूबीच जग्गाकै विषयमा कुरा नमिलेपछि बान्तवासहितका युवालाई ‘सुपारी’ दिएर खुँडा प्रहार गरिएको खुलेको छ ।

प्रहरीका अनुसार, पक्राउ परेका महर्जन र बान्तवा यसअघि समेत जेल परेका थिए । महर्जन प्रहरीको हत्या गरेको अभियोगमा १० वर्ष र राई लागुऔषध मुद्दामा जेल बसेको खुलेको छ ।

यस्तै, मंगलबार (हिजो) पक्राउ परेका गुरुङ समेत किर्ते मुद्दाका फरार आरोपित रहेको खुलेको छ । आपराधिक समूहले नै बानियाँमाथि खुँडा प्रहार गरेको थियो ।