कठमाडौं । प्रधानमन्त्रीका रूपमा केपी शर्मा ओलीको तेस्रो इनिङ्स आजदेखि सुरु हुने भएको छ । राष्ट्रपति रामचन्द्र पौडेलले दाबी प्रस्तुत गर्न तोकिएको समयावधि पूरा गरी ओलीलाई प्रधानमन्त्रीमा नियुक्त गर्ने राष्ट्रपतिको कार्यालय स्रोतले जानकारी गराएको छ ।

राष्ट्रपतिका प्रेस सल्लाहकार किरण पोखरेलले भने, “आज ५ बजेसम्म प्रधानमन्त्रीको दाबी प्रस्तुत गर्नका लागि तोकिएको समय हो । यो समय सकिएपछि राष्ट्रपतिज्यूले प्रधानमन्त्री नियुक्त गर्नुहुनेछ ।” शपथसहितका प्रक्रिया त्यसपछि अघि बढाइने उनले जानकारी दिए ।

राष्ट्रपतिको कार्यालय स्रोतका अनुसार, ओली आइतबार प्रधानमन्त्रीमा नियुक्त मात्र हुनेछन् । शपथग्रहणको प्रक्रिया सोमबार बिहान गरिनेछ । नियुक्तिअघि अनौपचारिक कार्यतालिका मात्र बनाइएको छ । सोमबार बिहान ११ बजे नयाँ प्रधानमन्त्रीले शपथ लिने तयारी छ ।