काठमाडौं । युरो–२०२४ को फाइनलमा आज दुई युरोपेली ‘जायन्ट’ इंग्ल्यान्ड र स्पेनबीच प्रतिस्पर्धा हुँदै छ । आजको खेलमा स्पेन र इंग्ल्यान्ड दुईमध्ये जुन टिमले उपाधि जिते पनि प्रतियोगितामा कीर्तिमान बन्नेछ । स्पेन प्रतियोगिताको कीर्तिमानी चौथो उपाधिको लक्ष्यमा रहँदा इंग्ल्यान्ड पहिलोपटक च्याम्पियन बन्ने दाउमा छ ।

फाइनलसम्मको यात्रा तय गर्दा स्पेनले लगातार ६ खेलमा जित निकाल्दै एक कीर्तिमान बनाइसकेको छ । यसको विपरीत असन्तुलित प्रदर्शन र प्रतियोगिताबाटै बाहिरिने उच्च सम्भावनाका बीच इंग्ल्यान्डले फाइनलसम्मको यात्रा तय गरेको छ ।

सन् १९६४, २००८ र २०१२ को युरोसँगै २०१० को विश्वकप विजेता स्पेनमा फाइनलमा असफल हुने डर छैन । उनीहरूमा प्रतियोगिताको सानदार लयलाई कायम राख्दै चौथोपटक युरोपियन च्याम्पियन बन्ने तीव्र आकांक्ष छ ।

स्पेनले समूह चरण पार गर्दा कुनै पनि गोल व्यहोरेको थिएन । प्रतियोगिताको क्वार्टरफाइनलमा घरेलु टिम जर्मनी र सेमिफाइनलमा मुख्य दाबेदार फ्रान्सबाट दबाब पाए पनि स्पेनले हालसम्म तीन गोल मात्र व्यहोरेको छ । यी दुवै खेलमा स्पेन २–१ ले विजयी भएको थियो ।

फ्रान्सविरुद्ध १–० ले पछि परेको अवस्था उल्ट्याउँदै जित निकाल्दा स्पेनका एक खेलाडी विश्वभर चर्चित बने । ती हुन्, लामिन यमल । १७ वर्षीय यी किशोर फ्रान्सविरुद्धको उक्त गोलसँगै युरो सेमिफाइनलमा गोल गर्ने प्रतियोगिताको इतिहासमै सबैभन्दा कान्छा खेलाडी बने । उनले यही शनिबार मात्र १७औँ जन्मदिन मनाएका हुन् ।

समूह चरणमा इंग्ल्यान्डको प्रदर्शन सम्झनलायक बन्न सकेन । तीनमध्ये दुई खेलमा बराबरी र एकमा जितसहित इंग्ल्यान्ड नकआउट चरणमा प्रवेश गरेको थियो । इंग्ल्यान्ड अन्तिम–१६ को खेलमा स्लोभेनियाविरुद्ध हारबाट केही सेकेन्ड मात्र पर थियो । इन्ज्युरी समयमा जुड बेलिंघमले प्रतियोगिताकै उत्कृष्ट ‘एक्रोबेटिक’ गोल गरेपछि इंग्ल्यान्डले खेललाई अतिरिक्त समयमा धकेलेको थियो । जसमा कप्तान ह्यारी केनले गोल गर्दै खेल पेनाल्टीमा पुग्नुअगावै इंग्ल्यान्डको पक्षमा राखेका थिए ।

क्वार्टरफाइनलमा स्वीट्जरल्यान्डविरुद्ध जितका निम्ति इंग्ल्यान्डले पेनाल्टी सुटआउटसम्म कुर्नुपर्‍यो । जसमा नायक बने बुकायो साका । युरो–२०२० को फाइनलमा इटालीविरुद्ध पेनाल्टी चुकाएर चर्को आलोचना खेपेका साकाले स्वीट्जरल्यान्डविरुद्धको खेलबाट आलोचकको मुख बन्द गरिदिए । तीन वर्षअघि नै हो, इंग्ल्यान्ड युरोपियन च्याम्पियनसिपको सबैभन्दा नजिक पुगेको । विश्वकै सबैभन्दा चर्चित क्लब प्रतियोगिता प्रिमियर लिगबाट ख्याति कमाए पनि इंग्ल्यान्डको राष्ट्रिय टिमले हालसम्म युरोपियन च्याम्पियनसिपको उपाधि जित्न सकेको छैन ।

यसपटक सेमिफाइनलमा डच टिमको चुनौती २–१ ले पन्छाएको इंल्यान्ड पुनः एकपटक उपाधिको नजिक छ । विजेताको छिनोफानो भने आइतबार राति जर्मनीको बर्लिनमा नेपाली समयानुसार १२ः४५ बजेदेखि सुरु हुने खेलको अन्तिम ह्वीसिलले गर्नेछ ।

फाइनलमा स्पेनका ड्यानी कार्भाहाल र रोविन ले नोमार्ड एक खेलको निलम्बनबाट पुनः टिममा फर्कनेछन् । दुवै खेलाडी जर्मनीविरुद्ध पहिलो रोजाइमा मैदान उत्रिएका थिए । तर, दोहोरो पहेँलो कार्डका कारण यी दुवै सेमिफाइनलमा निलम्बित थिए । मिडफिल्डर पेड्री चोटका कारण प्रतियोगिताबाटै बाहिरिइसके । यसबाहेक स्पेनी टिममा इन्ज्युरीको समस्या छैन ।

इंग्ल्यान्डबाट पनि सेमिफाइनलमा थकानका कारण दोस्रो हाफमा मैदान छोडेका कप्तान ह्यारी केन पहिलो रोजाइमा रहने निश्चित छ । चोटबाट पुनरागमन गरिरहेका लुक सले प्रतियोगिताको पहिलो दुई खेल बेन्चबाट सुरु गरेका थिए । फाइनलमा स्पेनविरुद्ध प्रशिक्षक ग्यारेथ साउथगेटले सलाई पहिलो रोजाइमा मैदानमा उतार्न सक्नेछन् ।