काठमाडौं । प्रमुख प्रतिपक्षी नेपाली कांग्रेसका सांसदहरूले डेंगी रोकथाम र नियन्त्रणका लागि जरुरी सार्वजनिक महत्त्वको प्रस्ताव दर्ता गराएका छन् । 

कांग्रेस सांसद प्रतिमा गौतम प्रस्तावक तथा कुुुसुमदेवी थापा, सीता मिजार र लिलाबोखिम लिम्बू समर्थक रहेका छन् । सार्वजनिक महत्त्वको प्रस्ताव सोमबार संसद् सचिवालयमा दर्ता भएको हो । 

प्रस्तावमा डेंगु नियन्त्रणका लागि प्रभावकारी नीति निर्माण गर्नुपर्ने आवश्यकता औंल्याएका छन् । जसमा छलफल गरी सरकारलाई आवश्यक निर्देशन र सुझाव दिन उनीहरूको आग्रह छ । “डेंगी पछिल्लो समयमा गम्भीर स्वास्थ्य चुनौतीका रूपमा आएको र यसको प्रभाव झन् बढ्ने हुनाले त्यसको रोकथाम र नियन्त्रणका सन्दर्भमा हाम्रो स्वास्थ्य पूर्वाधार अपर्याप्त र स्वास्थ्य प्रणाली कमजोर छ । त्यस कारण निकट भविष्यमा सिर्जना हुने गम्भीर असर र दीर्घकालीन रूपमा असर र रोकथाम तथा न्यूनीकरणका लागि संघर्षरत जनस्वास्थ्य तथा स्वास्थ्य प्रणालीमा सुधार आवश्यक छ,” प्रस्तावमा भनिएको छ, “यस विषयमा समयमै उपयुक्त काम नगरेको सन्दर्भमा यो प्रकोपले महामारीको रूप लिने र भविष्यमा झन् भयावह रूप लिन सक्दछ । त्यसकारण यसमा आवश्यक काम हुन जरुरी छ ।”