पोखरा । अविरल वर्षासँगै गण्डकी प्रदेशमा बाढीपहिरोमा परी शनिबार पाँचजनाको मृत्यु भएको छ । तीनजना बेपत्ता छन् । पाँचजना घाइते छन् ।

स्याङ्जा, पर्वत र तनहुँमा बाढीपहिरोमा परी मानिसको मृत्यु, बेपत्ता र घाइते भएका प्रदेश प्रहरी कार्यालय गण्डकीका प्रहरी वरिष्ठ उपरीक्षक रवीन्द्र रेग्मीले जानकारी दिए ।

स्याङ्जाको बिरुवा गाउँपालिकामा तीनजनाको मृत्यु भएको छ । शनिबार बिहान ५ बजेतिर ६५ वर्षीया गुइश्वरी शर्मा मरासिनीको घरमाथि पहिरो खसेको थियो । त्यो पहिरोबाट मरासिनी जोगिइन्, तर उनको घर जोगिएन ।

ज्यान बचाउन उनी छिमेकी माधव शर्माको घर गइन् । शरण लिन गएको घरमा पनि बिहान करिब ८ः२० बजे पहिरो खस्यो । घरमाथिबाट खसेको पहिरोबाट उनीहरू जोगिन सकेनन् । पहिरोमा परी मरासिनी, शर्मा र उनकी श्रीमती हरिमाया शर्माको समेत मृत्यु भएको प्रहरीले जनाएको छ ।

पर्वतमा शनिबारै दिउँसो ३ बजेतिर खसेको पहिरोमा परी बेपत्ता भएका दुईजनाको शव फरक–फरक ठाउँमा भेटिएको छ । फलेवास नगरपालिका–१, कार्किनेटास्थित कुलप्रसाद पाध्याको घर पुरिएको प्रहरीले जनाएको छ ।

प्रहरीका अनुसार, त्यहाँ पहिरो खस्दा घरभित्र सोही ठाउँका झलकप्रसाद शर्मा र स्याङ्जाको आँधीखोला गाउँपालिका–३, पाखरीगोर ढुंगाका तुलसीप्रसाद शर्मा थिए । पहिरोमा परी बेपत्ता भएका उनीहरूलाई प्रहरी टोलीले मृतावस्थामा फेला पारेको हो ।

तुलसीप्रसादको शव घटनास्थलभन्दा ३०० मिटर तल फेला परेको थियो । झलकप्रसादको शव स्याङ्जाको आँधीखोला–४, सेपतमा फेला परेको प्रहरीले जनाएको छ ।

शनिबारै दिउँसो बाढीपहिरोमा परी तनहुँमा तीनजना बेपत्ता छन् । शुक्लागण्डकी नगरपालिका–७, काउरेका हिरा नेपाली, अनिशा बास्तोला र श्याम भण्डारी पहिरोमा बेपत्ता भएका प्रहरीले जनाएको छ ।

शुक्लागण्डकी–७ कै विष्णुबहादुर नेपाली, विशाल तिमल्सिना, रवि घिमिरे, रूपकुमार नेपाली र विमल नेपाली घाइते छन् । खैरेनीटारस्थित अस्पतालमा उनीहरूको उपचार जारी छ ।