काठमाडौं । पोष्ट प्रोडक्सनको चरणमा रहेको चलचित्र ‘बेहुली फ्रम मेघौली’को पहिलो गीत सार्वजनिक भएको छ । थिम गीतको रूपमा सार्वजनिक गरिएको प्रमोसनल गीतसँगै निर्माणपक्षले प्रदर्शन मिति पनि घोषणा गरेको छ । 

शुक्रबार सार्वजनिक चलचित्रको ‘बिहे गर्ने कि नगर्ने ?’ बोलको गीतसँगै चलचित्र असोज १७ गते (घटस्थापना)को दिनबाट प्रदर्शनमा आउनेछ । 

गीतमा अविवाहितहरूलाई समाजले गर्ने प्रश्न समेटिएको छ । बिहे कहिले गर्ने भन्ने आम प्रश्न गीतमा छ । यही प्रश्नसँगै सुरु हुने गीत यही प्रश्नमा टुंगिन्छ । 

रोहित शाक्यको संगीत रहेको गीतमा कुशल पोखरेलको शब्दरचना छ ।

गीतको भिडियोमा नेपाली चलचित्र क्षेत्रमा नाम चलेका र अधिकांश अविवाहित कलाकारहरूले अभिनय छ । भिडियोमा दीपाश्री निरौला, प्रदीप खड्का, नाजिर हुसेन, धिरज मगर, साम्राज्ञी राज्यलक्ष्मी शाह, बेनिशा हमाल, शिल्पा मास्के फिचर्ड छन् । 

उनीहरूसँगै गीतमा सिनेमाका मुख्य कलाकारहरू निश्चल बस्नेत, स्वस्तिमा खड्का, विजय बराल र लोकेन्द्र लेखकलाई पनि देख्न सकिन्छ ।

स्वस्तिमा खड्काको कन्सेप्टमा भिडियो निश्चल बस्नेतले निर्देशन गरेका छन् ।

यो चलचित्रमा साजन काफ्ले र आकाश बरालको लेखन तथा निर्देशन छ । 

स्वस्तिमा खड्का र निश्चल बस्नेतको निर्माण रहेको सिनेमाको कार्यकारी निर्मातामा शंकर पाण्डे र फिरोज खड्का हुन् ।