काठमाडौं । नेपाल टेनिस संघको आयोजनामा आईटीएफ/ओलम्पिक सोलिडारिटी कोचिङ बिगिनर्स इन्टरमिडियट (सीबीआई) कोर्स बुधबार सम्पन्न भएको छ ।

अन्तर्राष्ट्रिय ओलम्पिक कमिटी र नेपाल ओलम्पिक कमिटीको सहयोगमा भएको कोर्समा २१ पुरुष र दुई महिला गरी २३ जनाको सहभागिता रहेको टेनिस संघअन्तर्गत कोचेज एडुकेसन डिपार्टमेन्टका निर्देशकसमेत रहेका टेनिस संघका सदस्य जयजीव हाडाले जनाएका छन् ।

आईटीएफअन्तर्गत साउथ, इस्ट र साउथ इस्टका डेभलप्मेन्ट अफिसर जोनाथन स्तब्स तथा आईटीएफ ट्युटरद्वय जरिना माई अरेभालो र मार्टिन सेटियवनले सहभागीलाई प्रशिक्षण दिएका थिए । उनीहरूलाई राष्ट्रिय ट्युटर शरद लामा, राजकुमार लामा र सूर्यभूषण बज्राचार्यले सहयोग गरेका थिए ।

नेपाल ओलम्पिक कमिटीका उपाध्यक्ष एवं कार्यकारी निर्देशक चतुरानन्द राज वैद्य, टेनिस संघकी अध्यक्ष ज्योति राणा, मार्टिनलगायतले एक कार्यक्रमबीच सहभागीलाई प्रमाण पत्र प्रदान गरे । सोही अवसरमा जितेन्द्र परियार र राजकुमार लामालाई कोचिङ एडभान्स प्लेयर कोर्समा उत्तीर्ण भएको प्रमाणपत्र प्रदान गरिएको थियो ।