काठमाडौं । उपप्रधान एवं गृहमन्त्री रवि लामिछानेले सत्तासमीकरण फेरबदल हुनेकुरा हल्ला मात्रै भएको बताएका छन् । 

सोमबार नयाँ बानेश्वरस्थित संघीय संसद् भवनमा सञ्चारकर्मीहरूसँग संक्षिप्त कुराकानी गर्दै गृहमन्त्री लामिछानेले सत्तासमीकरण फेरबदल हुन लागेकोबारे आफूलाई कुनै जानकारी नभएको बताए । 

बाहिर सञ्चारमाध्यममा आएका कुराहरू हल्ला मात्रै भएको स्पष्ट पारे । आफूले दुई नेतासँग कुराकानी गरेको भन्दै त्यस्तो छनक नपाएको उल्लेख गरे । 

"हल्ला मात्रै हो । त्यस्तो थाहा छैन । म पनि सरकारमै छु । सरकार गठबन्धनको एउटा पार्टनर नै हुँ । त्यस्तो केही पनि छैन । मेरो भर्खरै दुई नेतासँग कुरा पनि भयो । कहिलेकाहीँ विभिन्न प्रक्रियाहरूमा केही असमझदारी हुँदाखेरी भेटघाट गर्ने कुरा भइरहन्छ । सामान्य भेटघाट नै हो । यसलाई कुनै त्यस्तो गम्भीरतापूर्वक लिनुपर्ने केही पनि छैन," उनले भने । 

गृहमन्त्री लामिछानेले शीर्ष नेताहरूबीचको भेटघाट समान्य भेटघाटको रूपमा रहेको भन्दै त्यसलाई गम्भीरतापूर्वक लिनु नपर्ने बताए ।