काठमाडौं । नेपाल गुणस्तर परिषद्ले विभिन्न किसिमका कपडाको परीक्षण विधि र सुरक्षित सिसाको नेपाल गुणस्तर मापदण्ड पारित गरेको छ । उद्योग, वाणिज्य तथा आपूर्तिमन्त्री दामोदर भण्डारीको अध्यक्षतामा सोमबार मन्त्रालयमा बसेको ११२औँ परिषद्को बैठकबाट नेपाल गुणस्तर तथा नापतौल विभागले तयार पारेको उक्त मापदण्ड पारित गरिएको हो ।

गुणस्तर मापदण्ड पारित गरिएसँगै अब विभिन्न किसिमका कपडाको परीक्षण गरी त्यसलाई विदेश निर्यातमा सहज भएको विभागका प्रवक्ता प्रभातकुमार सिंहले जानकारी दिए ।

यस्तै, सुरक्षित सिसाको समेत मापदण्ड पारित गरिएको छ । सुरक्षित सिसालाई पनि विदेश निर्यातमा सहज हुने विभागले जनाएको छ ।

गुणस्तर पारित गर्ने उद्योग तथा वस्तुको अध्ययन गरी विभागको प्राविधिक समितिले परिषद्‌ पठाउने गर्छ । परिषद्का सदस्यसचिव विभागका महानिर्देशक रहने प्रावधान छ । रासस