नयाँ दिल्ली । भारतको १८औँ लोकसभाको पहिलो सत्र सुरु हुनुअघि प्रधानमन्त्री नरेन्द्र मोदीले सरकार चलाउन बहुमतले पुग्ने तर देश हाँक्न सहमति जरुरी रहेको बताएका छन् । उनले भने, “मेरो प्रयास हुनेछ कि सबैको सहमति लिएर भारत माताको सेवा गर्न सकूँ ।”

उनले थपे, “आजको दिन वैभवको दिन हो । स्वतन्त्रतापछि पहिलोपटक हाम्रो नयाँ संसद्‌मा शपथग्रहण हुन लागिरहेको छ । अहिलेसम्म यो प्रक्रिया पुरानो संसद्‌मा हुने गरेको थियो ।”

नयाँ सांसदको स्वागत गर्दै मोदीले भने, “जब देशका जनताले तेस्रो कार्यकालका निम्ति एक सरकारलाई मोहर लगाए, त्यसका लागि म जनताप्रति आभार व्यक्त गर्दछु ।”

सन् १९७५ जुन २५ मा संकटकाल घोषणा गरिएको समेत उनले स्मरण गरे । देशका जनताले आफूलाई तेस्रोपटक मौका दिएको भन्दै उनले दायित्व पनि तीन गुणा बढेको बताए ।

उनले भने, “दुईपटक सरकार चलाएको अनुभव मेरो साथ छ । तेस्रो कार्यकालमा पहिलेभन्दा तीन गुणा ज्यादा मिहिनेत गर्नेछु । यो नयाँ संकल्पका साथ म अघि बढिरहेको छु ।”

मोदीले सांसदसँग देशको धेरै आशा भएको बताउँदै भने, “म सांसदसँग अपिल गर्छु कि हामी यो मौकालाई उपयोग गरौँ र जनहितमा कदम उठाऔँ ।”

उनले अगाडि भने, “सदनमा सामान्य मानवीय अपेक्षा छ कि बहस होस् । निगरानी राखियोस्, मानिसको यो अपेक्षा हुँदैन कि नखरा पार्ने काम भइरहोस् । मानिस नारा चाहँदैनन् । देशलाई एक जिम्मेवार विपक्षी आवश्यक छ ।” बीबीसी हिन्दीबाट ।